Diabierna 15 di augustus 2025, den periodo di vakantie escolar, Departamento di Cultura Aruba a organisa cu gran exito e di 4er edicion di “Carrousel di Expresion, Talento y Creatividad”, un proyecto artistico y multidisciplinario realiza den colaboracion cu Buki di Pret.
E actividad a brinda un espacio inspirador pa tur mucha cu tabata desea di explora nan talento y siña den un ambiente creativo, mientras nan ta conecta y aprecia nos herencia y identidad cultural.
Tema Central: “E Cas ta Bon Traha”
Un lema cu a invita e participantenan pa descubri potencial, expresa identidad y contribui na un futuro briyante.
Na final di e tayer, e muchanan a presenta un show specialmente pa famia y publico presente, cu participacion den diferente disciplina artistico:
Baile: Madellene Kelly
Teatro: Joan Danies
Arte Visual: Jo-Anne Kock
Canto y Musica: Sra. Maybelline Arends-Croes
Tur a guia e participantenan den tecnicanan basico te cu nan presentacion final.
AgradecimientoNos ta mustra profundo gradicimiento na:
Sr. Freddy Montoya y Srta. Eleen Rasmijn, lider di proyecto pa Departamento di Cultura Aruba
Sr. Roland Helder di Grupo Masiduri y Sra. Esmara Martis di Departamento di Cultura Aruba
John F. Kennedy Education Center y tur voluntario cu a duna sosten constante durante e programa
Produccion Special
Durante e tayer, e muchanan a traha riba un produccion di Stichting Monumenten Fonds Aruba, cual a forma parti di Open Monumentendag 2025. E grabacion a tuma luga na IQ Music Productions, cu areglo y masterisacion di e Maestro Ivan Quandus y acompañamento di Coro Tutti Fruti dirigi pa e Maestra Maybelline Arends-Croes.
Un tema musical nobo, “E Cas”, cu letra y melodia original na encargo di Sr. John Freddy Tobon Montoya di Departamento di Cultura Aruba, a sirbi como inspiracion di e presentacion.
Participacion Cultural
E evento a conta cu grupo di baile y fundacion cultural, entre otro:
Grupo di Baile Dabaruida
Fundacion Rosea Cultural
2026 ta celebracion di prome lustro
Departamento di Cultura Aruba ta anuncia cu na 2026 lo tuma luga e celebracion di nos prome lustro di Carrousel di Expresion, Talento y Creatividad, cu tema central “Keiro Rond di Aruba”. E edicion aki lo prolonga su duracion y promete un experiencia cultural aun mas amplio y inolvidabel.
