Sint Maarten mester priorisa aumento di e ingresonan. Colegio di supervision
financiero Corsou y Sint Maarten (Cft) a insisti riba esey den combersacionnan cu
recientemente a hiba cu Gobierno di Sint Maarten. Sin reformanan, den e añanan venidero, e
pais lo no tin suficiente recurso pa gastonan publico y inversionnan importante.
Cft tin bastante tempo ta expresa su preocupacionnan tocante di e hecho cu e ingresonan di Sint
Maarten no ta alcansa e nivel anticipa. E carga fiscal colectivo ta 27 porciento, loke compara cu Aruba,
Corsou y Hulanda – caminda tin carga fiscal promedio di 40 porciento – ta abao. E sistema di impuesto
di Sint Maarten ta anticua y e Servicio di Impuesto tin problema di implementacion. Debi na esaki, e
pais ta perde ingresonan substancial. Banda di esaki, Fondo Monetario Internacional ta anticipa
deficitnan cerca Uitvoeringsorgaan Sociale en Ziektekosten Verzekeringen (SZV) na 2027 den caso cu no
ta modifica maneho. Sin reformanan, Cft ta anticipa deficitnan structural riba e presupuesto di Sint
Maarten.
Reformanan
Recientemente a inicia un trayecto di reforma pa Servicio di Impuesto. Esaki ta un paso den bon
direccion. Den e contexto aki, ta importante pa Servicio di Impuesto traha di manera mas integral pa
loke ta trata implementacion. Banda di esey, tin mas opcion pa Sint Maarten aumenta e ingresonan,
manera e introduccion di un impuesto riba turismo, enfoke riba e cobro di e impuesto riba alohamento y
e introduccion di un seguro medico general. E hecho cu un instancia so ta cobra impuesto y prima ta
conduci na un cobro mas eficiente y mas ingreso. Servicio di Impuesto por haci mas control pa medio di
colaboracion cu Audit Team Sint Maarten. Cft ta urgi pa implementa e plannan aki mas pronto posibel pa
asina genera mas ingresonan y realisa surplusnan riba e presupuesto. Di e manera aki, Sint Maarten por
mehora e posicion di likides y haci gastonan publico y inversionnan importante.
Presupuesto pa 2025 y 2026
A pesar cu a entrega e proyecto presupuestario pa 2025 na tempo, Sint Maarten atrobe no a logra pa
conclui e proceso presupuestario prome cu cuminsamento di aña. Pa e periodo 2025–2028, e pais ta
anticipa surplusnan. Den e marco aki ta supone cu na 2026 lo introduci un impuesto riba turismo. E
medida aki lo conduci na ingresonan adicional, sin embargo, ainda no a conclui e trayecto legislativo.
Pesey, Cft ta considera cu e surplusnan anticipa no ta sigur. E deficitnan persistente cerca e fondonan di
cuido tambe ta un riesgo pa e presupuesto nacional.
Actualmente, Sint Maarten ta trahando riba e presupuesto pa 2026. Cft ta urgi e pais pa haci tur
esfuerso pa stipula e presupuesto prome cu aña nobo ta cuminsa, pa prome biaha desde 2010. Di e
manera aki, e pais por duna un paso importante den e mehoracion di finanzas gubernamental.