E montante cu Corsou ta gasta na cuido ta relativamente alto. Na 2023, e montante aki tawata aproximadamente 14,7 porciento di bbp, mas cu por ehemplo Aruba (8,7%) y Sint Maarten (6,5%). Esaki ta pone cu por gasta menos riba otro terenonan di maneho, y ta conduci na mas presion di impuesto y prima. Manera CBCS a investiga, envehecimento di poblacion ta pone cu e presion riba e sistema di cuido ta aumenta ainda mas. Ta anticipa cu un solucion pa e problematica cerca CMC tambe lo conduci na gastonan adicional pa pais. P’esey, Corsou lo mester haci escogencianan. Tumando medidanan awor pa aumenta eficiencia den cuido, por reduci e dolor den futuro.
Segun IMF, Corsou ta gasta 20 biaha mas per capita na servicionan di laboratorio cu e promedio den Caribe. Den e sector aki tin sobrecapacidad, un problema cu aparentemente tambe ta ocuri den otro partinan di e sector di cuido. Anualmente, na Corsou ta skirbi un promedio di 20 recept pa persona, compara cu 14 na Aruba y 12 na Hulanda. Ademas, frecuentemente ta usa remedinan costoso di marca. Na Corsou, hopi hende ta haci uso di cuido di emergencia (caro) mientras nan tambe por a acudi na dokter di cas pa ricibi cuido.
Medidanan
Corsou por tuma medidanan pa haci cuido mas pagabel. Ya caba a haci bastante analisis, awor ta importante pa implementa. E ultimo añanan, demasiado poco reforma efectivamente a ser implementa.
Manera a conseha den Pakete di Pais, pa medio di fortalecemento di cuido primario lo por alivia e presion riba specialistanan y hospitalnan. Reglanan mas estricto pa referencia y un enfoke dirigi riba barionan ta importante den e marco aki. CMC ta indica cu pa medio di fortalecemento di e funcion di gatekeeper di (oficina di) dokter di cas, por alivia e presion riba cuido di emergencia y evita cu pashentnan cu kehonan simpel ta ricibi cuido innecesariamente costoso. Den e marco aki, colaboracion den cadena ta crucial.
Manera IMF ta indica, por reduci e gastonan pa remedi. Por haci esaki cambiando remedinan caro di marca pa opcionnan generico mas barata den mas caso. Pais ta purba di haci esaki desde 2019 caba, pero te awor no a logra. Revision di e pakete basico tambe por contribui na reduccion di e gastonan.
Prevencion ta miho cu cura. Dunando mas cuido preventivo y promoviendo un estilo di bida saludabel, por reduci e gastonan di cuido ainda mas. Precisamente considerando e envehecimento di poblacion inminente, ta importante pa hende bira bieu den bon estado di salud.
Actualmente, apenas tin incentivonan financiero den e sistema di cuido. Esaki ta pone cu cuido ta accesibel, pero na mes momento tampoco tin freno riba consumo di cuido. Manera IMF ta indica, un aumento di e contribucion propio pa esnan cu por paga esaki, por contribui na moderacion di consumo di cuido.
E situacion financiero di CMC actualmente no ta stabiel ainda. Cft ta urgi Corsou pa formalisa e solucion pa CMC mas pronto posibel, y pa duna claridad tocante di e gastonan (adicional).
Cft ta subraya cu e medidanan aki ta contribui na e mehoracion di e salud financiero tanto di e sector di cuido como di pais.