Diahuebs, 2 di juni 2022 den un auditorio completamente yen Camara di Comercio y Industria (KvK) a tene un Town Hall Meeting riba e topico di Reforma Fiscal. KvK a organisa e encuentro aki pa por intercambia cu e comunidad empresarial riba e preocupacionnan y ideanan existente relaciona cu e plan di Gobierno pa introduci un sistema di BTW entrante 1 di januari 2023.
KvK, huntu cu varios stakeholders, a asisti na e reunionnan y diferente sesion cu Gobierno y Departamento di Impuesto (DIMP) a organisa. E intencion di KvK ta pa contribui na mehora e sistema di impuesto cu ta anticua, fragmenta y complexo.
KvK ta na fabor di un reforma fiscal integral cu wordo implementa a base di budget-neutral y cu lo resulta den un sistema moderno, simplifica y balansa. Ta imperativo pa inclui reduccion di e gastonan di Gobierno, particularmente e gastonan di Payroll y di producto y servicio. E proposicion cu Gobierno a presenta no ta un reforma fiscal integral, no ta reduci e complexidad di e sistema di impuesto, ni tampoco ta budget-neutral y hasta tin e riesgo cu Aruba lo bira excesivamente caro. Ademas, teniendo cuenta cu e tempo y capacidad limita, tin duda si introduccion di e BTW entrante 1 di januari 2023 lo ta factibel.
Durante di e Town Hall meeting KvK a duna un introduccion cortico encuanto e sistema di BTW proponi y a elabora riba e consecuencia directo cu e sistema nobo lo tin pa loke ta trata algun aspecto importante, entre otro: trabaonan administrativo adicional, inflacion, aumento di costo di haci negoshi, introduccion di sueldo minimo pa directornan, aumento di e tarifa di impuesto di importacion (invoerrechten) y cambio den impuesto di entrada (inkomstenbelasting).
KvK a keda hopi satisfecho cu e acogida y e participacion na e Town Hall meeting. E participantenan a expresa nan preocupacionnan, a haci varios pregunta y tabatin diferente sugerencianan. A enfatisa cu comercio no tin espacio pa carga mas gasto, particularmente si no tin un compensacion balansa a cambio. Esaki ta un ratificacion cu e concepto di Reforma Fiscal tin hopi aspecto cu mester di mas clarificacion y cu comercio no ta di acuerdo cu algun punto.