Addonsito J. Croes
E siman cu a pasa a tuma luga den Cas di Cultura e concierto Kross & Kross di e artista- y famianan Chris Kross y Tania Kross.
Tawata dos concierto unico di calidad halto cu di principio te final a pone e publico presente disfruta sin fin. E publico a consisti di Aruba su hendenan di un gusto unico cultural moderno.
E banda, cu a haci un tremendo presentacion, tawata bou guia di e superstar Chris Kross y a consisti di artistanan di oro Arubano manera Ivan Quandus, Johnny Scharbaay, Christopher Rodulfo, Pièrre Koolman, Schlipken Croes y Jorzinho Kelly.
Cancionnan presenta tawata e.o. Toch mi sa, A Rosa y el sauce, Min’sa di Padu, Rebiba, Wow’i cariño, Andicuri, Atardi, Spain, Nenita, Plegaria y hunto cu artista local Edjean Semeleer e cantante Tania Kross a presenta e hit grandi, original di Montserrat Caballé y Freddy Mercury, titula Barcelona cu Tania Kross tin riba e plataforma Youtube mas cu 7000.000 views.
Tambe e artistanan a pidi e publico pa no lubida di coopera y sostene Cas di Cultura su campaña di recaudamento di fondo cu ya a cuminsa. Na nomber di nos Stichting Klein Aruba nos ta felicita Chris-, Tania Kross, tur e musiconan y sigur Karen- y Gerold Kross cu sosten di Vibration PR & Media di Maria Silva cu dos concierto unico y completo bendi. Mas informacion y mas potret por bishita www.Arubamusician.com.
