Congreso di AVP 4 di october, segun lider di partido, ta marca cuminsamento di un era di relevo
Durante e conferencia di prensa di diabierna ultimo na Cas di Partido, lider di AVP y Minister President Mike Eman a enfatisa pakico e ta considera e proximo Congreso di AVP dia 4 di october di importancia historico. Pa Eman, e relevo plania den liderazgo ta trata di cambio di persona, pero tambe di asumi responsabilidad pa futuro di un instituto politico cu, na momentonan decisivo, semper a hunga un papel di vanguardia den desaroyo di Aruba.
“Un esencia importante di AVP ta cu semper nos tabata na cuna di desaroyonan nobo y fundamental pa Aruba. AVP semper tabatin un cita cu e deseonan, idealnan y necesidadnan di comunidad Arubano.”
Eman a enfatisa cu, atraves di generacionnan, AVP semper a para na cuna di reformanan estatal, social y economico grandi pa Aruba: for di e despertamento politico di Aruba y e lucha pa mas autonomia, te na Status Aparte y e modernisacion continuo di nos pais.
“For di e despertamento di Aruba te na e desaroyo di nos pais como uno di e sociedadnan mas prospero y progresivo den nos region: cada biaha lidernan di nos instituto a asumi responsabilidad ora Aruba tabata dilanti di un encargo historico nobo.”
Segun Eman, den tur esaki un conviccion social-cristian semper a sirbi como guia. E buskeda di Bon Comun fundamenta riba balornan manera amor pa prohimo, solidaridad, bon wardador, dignidad humano y husticia social.
“For di e pioneronan di Status Aparte te na e reformadornan di e fundeshinan social y economico di Aruba moderno, lidernan den nos organisacion tabata pioneronan di cambio. Ta precisamente pesey mi ta considera importante cu, awor cu Mundo y Aruba ta drenta un periodo di cambionan technologico grandi cu impacto riba formacion di sociedadnan, tambe den nos partido nos mester crea espacio pa un generacion di e tempo aki. Eman ta cualifica e periodo nos dilanti un cu ta yama tambe pa un era di relevo: un tempo den cual liderazgo, gobernacion y organisacion ta wordo pasa na un generacion di relevo pa responde na e tempo nobo nos dilanti.”
Un carera politico cu sosten excepcional
Mike Eman por wak atras riba un carera politico largo, den cual durante eleccion tras eleccion el a ricibi sosten abrumador di comunidad Arubano. Desde introduccion di Status Aparte, ningun lider politico na Aruba a logra mas voto preferencial cu Mike Eman, cu mas di 8.000 voto personal. Hasta ora el a participa como ultimo candidato riba lista electoral, el a logra un cantidad record di voto preferencial pa e posicion ey.
Eman tabata Minister Presidente di Aruba di 2009 te 2017 y ta ejerce e funcion aki atrobe desde maart 2025.
Bou di su liderazgo, Aruba a logra un recuperacion excepcional despues di e crisis financiero-economico internacional di 2007-2008. Su gabinetenan a pone na marcha un agenda amplio di inversion cu a renoba y transforma gran parti di infrastructura publico di Aruba, su red di caminda, barionan y areanan urbano y publico.
Ademas, reformanan profundo a wordo implementa pa fortalece sostenibilidad di e sistemanan di pension y seguro medico. Na mes momento, proteccion social a wordo amplia fundamentalmente, cu entre otro introduccion di un pension general y diferente forma di sosten (toeslagen) pa esnan mas vulnerabel den comunidad Arubano. Cada biaha cu Eman ta asumi e responsabilidad como Minister Presidente, e a lidera un strategia di cooperacion strategico pa promove un colaboracion mas estrecho y duradero den Reino.
Eman ta expresa cu liderazgo no ta wordo demostra solamente den loke nos logra di realisa hunto cu un team y un comunidad, pero tambe den e capacidad pa, na e momento corecto, crea espacio y duna contenido na e necesidadnan di e epoca.
“Tin un momento cu responsabilidad mes ta nifica cu bo mester pasa e batuta. Cu bo ta percura pa un generacion nobo no solamente haya e oportunidad pa para dilanti, sino cu nan realmente ricibi e confianza, e espacio y e responsabilidad pa lidera.”
“Cu dolor den nos curason, pero cu confianza”
Vicepresidente di Directiva di AVP, Clifford Heyliger, a enfatisa e significado special di e Congreso cu ta bin:
“Nos ta haci esaki cu dolor den nos curason, pasobra durante tanto aña Mike tabata cara, forza y inspiracion di nos instituto. Pero na mes momento nos ta realiza con importante e momento aki ta. Un organisacion fuerte tambe mester ta capaz di renoba su mes na tempo y prepara su futuro.”
Tambe Minister Wendrick Cicilia, cu den partido ta wordo mira como e persona cu ta proyecta pa representa un generacion nobo di liderazgo, a papia tocante significado di cooperacion y comparti ideanan profundo cu Mike Eman.
“E añanan bunita durante cual mi a haya e privilegio di cana hunto cu nos lider Mike Eman y di reflexiona cu ne tocante nos responsabilidad pa cu Aruba, ta forma pa mi un fundeshi importante pa loke awor ta para dilanti di nos. E sapato cu mester yena ta grandi, pero ainda mas importante ta e responsabilidad pa sigui carga e balornan y e encargo di e instituto di pueblo, pa pueblo, cu pueblo cu ta AVP.”
Na diferente momento Eman a expresa publicamente su confianza den Cicilia y a enfatisa cu renovacion solamente por ta duradero ora e ta construi riba pasa experiencia y balornan pa e generacion di relevo, asina continuidad di principionan fundamental ta worde sigura y porta ta worde habri pa renovacion.
4 di october: continuidad y renovacion
Segun Eman, e Congreso di AVP dia 4 di october mester, pesey, bira mas cu un Congreso regular di partido. Lo e ta un momento pa reflexiona riba valornan di nos instituto y habri espacio pa e era di relevo.
“Generacionnan prome cu nos a asumi responsabilidad pa Aruba na momentonan crucial. Nos responsabilidad awe ta di percura pa e mesun organisacion keda fuerte, relevante y na servicio di nos pueblo tambe pa e siguiente generacion. Nos no ta pasa solamente un funcion. Nos ta pasa un encargo.”
Pa Eman, e Congreso ta representa asina un continuacion di e responsabilidad di AVP pa cu pueblo Arubano, y na mes momento e cuminsamento di un capitulo nobo, cu forzanan nobo cu lo duna forma na e yamada di nos tempo.
Mike Eman: “Hendenan ta cambia, generacionnan ta cambia, pero nos cita cu Aruba ta keda.”
