PROYECTO DI PRESUPUESTO NACIONAL
Gobernacion di Sint Maarten a alcansa un milestone historico despues di e aprobacion unanimo di e Proyecto di Presupuesto Nacional pa aña 2027 door di Conseho di Ministernan riba diahuebs, 25 de juni 2026.
E Minister di Finansa a anuncia cu ta spera cu e Presupuesto Nacional 2027 lo completa e proceso constitucional dentro di e plaso legalmente prescribi. Maske varios paso importante ta keda ainda prome cu ratificacion, e aprobacion aki door di Conseho di Ministernan ta pone Sint Maarten den un posicion pa tin un presupuesto nacional aproba prome cu fin di aña, pa prome biaha den historia di e pais.
E milestone aki ta resultado di lunanan di preparacion, un colaboracion sin precedente den henter Gobierno, y un decision debidamente pensa pa siña for di pasado y cambia fundamentalmente e manera cu e presupuesto nacional ta wordo prepara.
Ora a presenta e Presupuesto Nacional 2026 na Parlamento, Minister di Finansa Marinka Gumbs a laga mas cu cla cu e patronchi di hopi aña di presupuestonan atrasa no por a sigui mas. En bes di trata e retrasonan aki como datonan isola, e Ministerio a scoge pa examina e causanan profundo cu a contribui na e retrasonan ripiti durante hopi aña. E conclusion tabata cla: entrega presupuesto na tempo lo rekeri mas cu simplemente traha mas duro; e tabata rekeri traha diferente.
E ciclo di presupuesto 2027 a marca un cambio fundamental den e enfoque di Gobierno pa cu trahamento di presupuesto. En bes di cuminsa cu numbernan so, e proceso a cuminsa cu strategia. Na februari, Ministerio di Finansa a lansa e ciclo di presupuesto 2027 cu su prome Strategic Budget Session (Sesion Strategico di Presupuesto), hibando hunto Ministernan, Secretarionan General, Controladornan Financiero, Chiefe di Staff, e ekipo di Presupuesto Basa riba Politica, y e Departamento di Politica Financiero (FBBB). Representantenan di CFT tambe a atende e sesion como observador.
E enfoque di colaboracion aki a sigui den e lunanan despues via sesionnan regular di trabou y apoyo specifico pa ministerionan cu tabata rekeri asistencia adicional. Door di involucra e ministerionan mas trempan y traha estrechamente cu nan den henter e proceso, Gobierno por a alinea e prioridadnan di politica cu e recursonan disponibel, identifica desafionan mas lihe, y mihora tanto e calidad como e puntualidad di e preparacion di presupuesto. E combersacionnan ey a duna e base pa un proceso di presupuesto construi riba planificacion en bes di urgencia.
Gobierno a sigui implementa tambe e Presupuesto Basa riba Politica (Policy-Based Budgeting), fortaleciendo e conexion entre gasto publico y e resultadonan di politica cu e kier logra. En bes di mira e presupuesto como un coleccion di gasto, a reta e ministerionan pa defini claramente kico nan tabatin pensa de logra, con e prioridadnan ey tabata apoya e obhetivonan mas amplo di Gobierno, y con e recursonan publico lo a contribui na resultadonan medibel.
Durante henter e ciclo di presupuesto, e ekipo di Presupuesto Basa riba Politica dentro di Ministerio di Finansa a traha estrechamente cu tur ministerio, dunando guia y apoyo tecnico cu a mihora e calidad, consistencia y coherencia di e entreganan di presupuesto, miertras a yuda e ministerionan keda riba schema.
E Minister di Finansa a enfatisa cu e logro aki ta comparti. Esaki no ta un exito cu ta pertenecé na Ministerio di Finansa so. E ta pertenecé na e Gobierno aki. E ta pertenecé na cada ministerio cu a compromete su mes na e proceso, cada ambtenaar cu a contribui na preparacion di e bukinan di politica, cada Controlador Financiero cu a traha incansablemente tras di cortina, cada Secretario General cu a duna liderazgo dentro di nan ministerio, y cada colega Minister cu a asumi e propiedad di e prioridadnan di nan ministerio.
Minister Marinka Gumbs a gradici su coleganan miembro di Conseho di Ministernan pa a brasa un enfoque mas disciplina pa e proceso di presupuesto. Nan envolvimento trempan, escohencianan dificil di politica, y participacion activo a haci esaki un esfuerso berdaderamente di henter Gobierno.
E Minister di Finansa a reserva un reconocemento special pa e Secretario General di Finansa, Sra. Roxanne Howell, e Departamento di Politica Financiero y e ekipo di Presupuesto Basa riba Politica, lidera internamente pa Christian Grannum cu apoyo di maneho di proyecto pa Grant Thornton, Jan Ludolf Herees y Robert van Zeeland, pa e liderazgo cu nan a duna durante e proceso di reforma.
Hopi biaha trahando fuera di bista di publico, e profesionalnan aki a duna e coordinacion stabili, huicio sano, y enfoque di colaboracion rekeri pa transforma un reforma ambicioso den un resultado tangibel.
E Minister a agrega cu e milestone aki ta establece tambe un expectativa nobo pa Gobierno: “Nos a mustra cu reforma institucional ta posibel. Nos a demostra cu cu planificacion, disciplina, y propiedad colectivo, Sint Maarten por entrega su presupuesto nacional na tempo. Nos a hisa e standard. Nos responsabilidad no ta pa demostra mas cu e por wordo haci, sino pa sigui mihora e calidad di nos entreganan di presupuesto miertras nos ta refina nos plasonan aña tras aña.”
Miertras pasonan constitucional importante ta keda prome cu e presupuesto yega Parlamento, e milestone aki ta duna confiansa cu e pais ta drentando un capitulo nobo den maneho financiero publico. E trabou ta sigui, pero e fundeshi a wordo poni.
Reflehando riba e logro, Minister Gumbs a conclui: “E logro aki ta significante, pero e no ta e destino final. E ta evidencia cu nos ta moviendo den e direccion corecto. E Gobierno aki ta keda comprometi pa continuamente mihora tanto e calidad di e presupuesto como e disciplina di e proceso cu ta produci’ele. E pueblo di Sint Maarten no merece nada menos.”
E Proyecto di Presupuesto Nacional 2027 a wordo entrega awor na CFT pa nan conseho. Ademas, e Minister di Finansa a entrega un Plan di Mihoracion pa e proceso di presupuesto 2027, reflehando su compromiso pa e terminacion na tempo di e Presupuesto Nacional 2027. E fasedan cu ta keda di e proceso di presupuesto ta inclui e revision door di Conseho di Consulta prome cu e proyecto di presupuesto wordo entrega na Parlamento.