Ku tristesa enorme i profundo nos tin ku yama ayó na Paul Hoetjes, un leyenda di konservashon di naturalesa den Hulanda Karibense i kofundadó di Dutch Caribbean Nature Alliance (DCNA). Paul Hoetjes a bai sosegá riba 13 di novèmber 2020.
Paul su fayesimentu tabata un shòk pa e personanan ku tabata stim’é, entre nan hopi ku tabata forma parti di e mundu di konservashon di naturalesa. Paul tabata konosí komo un kabayero ku hopi kariño kende a dediká gran kontribushon na inisiativanan enorme di konservashon di naturalesa den region di Karibe, partikularmente riba tereno di ref di koral, turtuga di laman i mamífero marino. E tabata un mentor pa hopi hende, kendenan tabatin hopi na su ideanan, konsehonan i su sosten den kurso di añanan.
Paul a muda di Indonesia pa Kòrsou ku su famia tempu ku e tabata un mucha chikitu. El a graduá den biologia na Universidat di Amsterdam (UvA) i a bira hende aktivo den konservashon di ref di koral i djis despues di a regresá Kòrsou el a kuminsá traha na e akuario di laman akinan.
Na kuminsamentu di 2020 Paul a baha ku pinshun despues di un karera di binti aña komo kordinadó di maneho pa naturalesa na Hulanda Karibense, trahando pa Gobièrnu Sentral di Antia na Kòrsou for di 1998 te 2010 i for di 2010 te 2020 pa e Ministerio di Agrikultura, Naturalesa i Kalidat di Kuminda (LNV), stashoná na Boneiru, trahando pa e área di Hulanda Karibense. Durante e añanan akí e tabata responsabel pa formulashon i implementashon un maneho di naturalesa nashonal pa e islanan, ku a resultá den Maneho di Naturalesa di Antia 2000-2005, e Plan di Maneho di Naturalesa i Medioambiente di Antia 2004-2007, e Plan di Maneho di Naturalesa di Hulanda Karibense 2013-2017 i últimamente den e Plan di Maneho di Naturalesa i Medioambiente pa Hulanda Karibense 2020-2030.
Paul tabata embolbí den hopi inisiativa di konservashon. Entre otro e tabata e persona sentral den kreashon di DCNA na 2005, un ret di kontakto regional di áreanan protehá lantá ku e meta di asistí e organisashonnan di maneho di parke riba e islanan di Aruba, Boneiru, Kòrsou, Saba, Statia i St. Maarten. Paul a duna kontribushon na tantísimo manera na maneho di medioambiente, edukashon i fundashon di áreanan protehá na Hulanda Karibense. Algun di e tantísimo logronan di Paul tabata, e formashon di Áreanan Protehá di Mamífero Marino i e nominashon di Saba Bank komo un área rekonosé internashonalmente komo área marino protehá, lantamentu di e Santuario Yarari pa mamífero marino i tribon den e awanan di Hulanda Karibense i e Parke Nashonal Mount Scenery.
Paul tabata embolbí aktivamente den vários akuerdo multilateral regional i internashonal di medioambiente, manera un delegado na e Protokòl di Áreanan Espesialmente Protehá i Founa & Flora , e Konvenshon Inter-Amerikano pa protekshon di Turtuga di Laman , e Inisiativa Internashonal di Ref di Koral i e Inisiativa Karibense pa Ret di Kontakto Global pa Monitor Ref di Koral .
Paul su ekspertisio, dedikashon enorme na konservashon i su intentonan kontinuo pa promové koperashon na benefisio di naturalesa i komunidat, a hasié un persona ku a duna kontribushon enorme na e status di naturalesa i konservashon den nos region.
