E minister di Asuntonan Exterior di Republica Bolivariano di Venezuela, Yván Gil, a reuni cu e minister di Asuntonan Exterior di Reino Hulandes, Tom Berendsen, cu e meta pa “fortifica e agenda di cooperacion y respet mutuo”. E reportahe di Telesur ta bisa cu Venezuela a reafirma su compromiso cu e politica di bon bisiña, priorisando fortificacion di relacionnan bilateral y e dinamismo di intercambio cultural y humano cu e islanan di Aruba, Corsou y Boneiro. Tambe a reafirma e compromiso pa promeve turismo cu e “islanan hulandes” ABC. Gobierno Bolivariano lo duna sosten pa inversion y cooperacion cu companianan hulandes den varios sector di economia venezolano, cu enfasis particular riba areanan clave manera agricultura, energia, y transporte.
Kico e reportahe aki ta bisa nos? E minister di Asuntonan Exterior di Venezuela no a reuni cu Minister Presidente of minister di economia di Corsou. E compromiso no ta cu companianan local, sino cu companianan hulandes. E ta inaceptabel cu e islanan, siendo bisiña di Venezuela pa siglonan, no ta partner di combersacion. Al contrario, Venezuela ta dirigi su mes na Hulanda pa papia tocante relacion bilateral i intercambio cultural y humano cu e islanan. Con bin e asunto ta bai di e forma aki? Pasobra Corsou ta simplemente un colonia di Hulanda. Nos mandatarionan keto bai ta acepta e sistema economico y politico caminda Hulanda ta somete, domina y anexa e pueblo di Corsou y us’e na su komeniencia.
Asunto cu Corsou tin autonomia y ta partner igual den reino ta puro farse. Aunque cu ta papia di 4 partner igual den reino, den realidad no tin igualdad di posicion y poder entre e partnernan, sino simplemente ekivalencia. Statuut ta bisa den su articulo 41 cu cada pais tin autonomia pa atende su asuntonan propio. Tur interes cu nan tin comun, nan por atende na un manera ekivalente. Si Corsou kier desaroya den su plan di desaroyo agricultura, cria, intercambio di alimento, investigacion cientifico y intercambio cultural cu Venezuela ta puramente interes di Corsou. E hecho cu ta Hulanda mester atende esakinan pa Corsou ta mustra bon cla cu Corsou ta colonia. Haci negocio den un forma bilateral cu pais bisiña Venezuela ta asunto propio di Corsou, asunto propio y interes directo di pueblo di Corsou. Venezuela cu sa cu ta colonia di Hulanda nos ta, ta acudi directamente na e minister hulandes, pasobra Venezuela sa cu gobierno di Corsou no tin ningun autoridad.
Statuut ta nada mas cu un triki di politiconan hulandes pa laga Nacionnan Uni y mundo kere cu Hulanda no tin colonia mas y pa nos pueblo y politiconan keda den e ilusion cu ta nos mes ta maneha nos propio asuntonan. Un ehempel di e ilusion aki ta e Areglo Mutuo (Onderlinge Regeling) cu Prome Minister Pisas a firma cu gobierno di Hulanda na april 2023. Gobierno a broma masha pisa y declara cu su gobierno a bari CHE y COHO for di mesa. Pero den realidad gobierno Pisas a drenta un Areglo Mutuo cu Hulanda caminda no ta tres makamba sienta na Den Haag, sino henter un “Ministerie van Binnenlandse Zaken en Koninkrijksrelaties” di Hulanda ta goberna Corsou te 2027. Nan unico tarea ta ehecuta “landspakket Curaçao”. Anto esaki sin envolvimento di e Parlamento cu pueblo a eligi cu voto popular pa controla gobierno.
Como colonia hulandes Corsou ta sirbi como trampolin pa inversionistanan hulandes haci negocio cu Caribe y Latino America. For di Groeistrategie/Groeiakkoord por a mira cu e meta ta pa crea un situacion ideal pa empresarionan hulandes subi mercado di region. E acuerdo di Venezuela y Hulanda pa loke ta turismo, lo favorece companianan manera Tui, KLM, Corendon y empresarionan hotelero. E acuerdo entre e dos paisnan lo no trece ningun beneficio pa Corsou.
Un pais cu no tin relacionnan exterior den su man nunca por hiba un maneho economico na fabor y interes di su pueblo. Statuut ta bisa den articulo 3 cu asuntonan exterior ta den man di Reino. Cu otro palabra asuntonan exterior di Corsou mester ser atendi pa organonan di reino y no Corsou mes. Pa colmo reino ta sinonimo di Hulanda. Articulo 5 di Statuut ta prescribi y legitima cu pa loke ta trata reino tur organo di pais Hulanda ta bira organo di reino. Cu otro palabra: Corsou hamas lo por hiba un politica economico independiente cu su bisiñanan Venezuela, Colombia, Trinidad, Barbados y Jamaica. Pa esaki sosode e minister di asuntonan exterior y di economia hulandes mester aproba y cera e convenionan pa Corsou. Statuut ta basa bon cla cu cada un di e acuerdonan cera mester ta na prome luga na interes di reino y Hulanda. Si no, fiesta no ta sigui. Asina aki nos ta laga Corsou pa generacionnan cu ta bini? Nunca!!! E lucha pa un Corsou independiente ta sigui.