Awe Corte den prome instancia a anuncia su decision riba e caso cu algun votado a cuminsa pa reconteo di votonan di eleccion di dia 25 di juni ultimo.
Ta trata aki di Arthur Dowers, Mike de Meza y Mervin Wyatt Ras, kende a cuminsa e caso como votado y no como candidatonan di AVP. Nan peticion a wordo rechasa y na mesun momento a compronde for di nan abogado mr. Desiree Croes cu a apela. Tamb a bay un carta pa Conseho Supremo Electoral, informando nan di e decision pa apela.
Huez a bisa den e sentencia cu e ta di acuerdo cu Conseho Electoral cu e peticion pa reconteo no ta compaña pa motibo hustifica of hechonan concreto cu ta pone Corte tuma e decision pa bay di acuerdo cu nan peticion di reconteo.
Tambe el a bisa cu Dowers mes a splica cu e cantidad di votonan invalido aña pa aña ta sigui aumenta. No por papia di un cantidad grandi di votonan invalido straño, si esaki ta e tendencia di ultimo añanan. No a demostra cual tabata e iregularidadnan cu nan ta bisa di a señala caba durante e sesion di Conseho Electoral pa ratifica e resultado. Y tampoco ehempelnan a wordo duna.
E potret Hues di un formulario di votacion cu ta mustra cu a pasa un poco over di e circulo no por wordo uza pasobra e ta violacion di derecho di voto, niun hende mag sa pa kende un pesona a vota. Voto ta secreto. No por uza e fotonan aki pa demostra iregularidad. Si uza e fotonan ey mes, Hues ta bisa cu e no ta prueba cu iregularidad a tuma luga.
A base di e argumentonan aki a rechasa peticion di e votadonan.
Corte a rechasa peticion di reconteo di voto
