Durante un rueda di prensa diahuebs mainta, Prome Minister Evelyn Wever-Croes a anuncia kendenan lo bira Minister pa Gabinete Wever-Croes II. Despues di un periodo di 2 luna di formacion di un gobierno nobo, Aruba ta conoce su ministernan nobo pa e siguiente gobernacion.
Sra. Evelyn Wever-Croes di Partido MEP. Lo ta encarga cu Asunto General, Innovacion, Organisacion Gubernamental, Infrastructura y Planificacion Teritorial, alabes Prome-Minister.
Sr. Ursell Arends di Partido RAIZ: Integridad, Naturalesa, Transporte y Cuido di Grandinan, Alaves Vice Prome Minister. E Ministerio lo enfoca riba e retonan den cada un di e temanan aki den e temporada nos dilanti, cu mester bay man den man cu desaroyo di nos pais.
Sra. Xiomara Maduro di Partido MEP: Finansas y Cultura. Den e situacion financiero dificil cu nos ta y e retonan nos dilanti, cu lo ta grandi, nos a scoge pa continuidad y experiencia di ultimo añanan. Alaves Sra. Maduro ta e di dos Vice Prome Minister.
Sr. Geoffrey Wever di Partido RAIZ: Asunto Economico, Comunicacion y Desaroyo Sostenibel. E exito di nos recuperacion como pais lo depende di e desaroyo economico, con resiliente nos por haci nos pilar economico di berdad. Den e ultimo añanan nos a traha riba e maneho y e fundeshi y awor mester bay ehecut’e.
Sr. Rocco Tjon di Partido MEP: Husticia y Asuntonan Social. Cu su preparacion riba e area di husticia y combina cu asuntonan social, lo enfoca mas riba prevencion. Sra. Vanessa Tjon-Kock, casa di sr. Tjon, actualmente Korps Chef, lo bandona e funcion aki temporalmente pa e periodo di e gabinete aki y lo ta encarga cu un otro funccion. Esaki pa evita cualkier impresion di conflicto di interes cual pa nos Gabinete ta importante den cuadro di integridad.
Sr. Endy Croes di Partido MEP: Enseñansa y Deporte. Sr. Croes ta un persona cu un pasion y dedicacion inmenso pa su trabou, pa mucha y hobennan, cu semper ta scucha tur actor importante, den e caso aki den enseñansa. Sr. Croes lo sa di aplica esaki pa maneha e area di enseñansa, trahando cu e profesionalnan riba e tereno y trece trankilidad. Prome Minister lo tey pa yuda caminda cu tin mester.
Sr. Glenbert Croes di Partido MEP: Labor, Integracion, Energia. E dos carteranan di Labor y Integracion a wordo poni hunto pa alinea e maneho y acelera e proceso. Inversionistanan y companianan local cu aplica pa permiso mester haya contesta rapido, si of no, pero rapido y den tur transparencia. E minister lo tin un reto cu esaki y e lo ta encarga tambe cu nos maneho di energia.
Sr. Dangui Oduber di Partido MEP: Salud Publico y Turismo. Aki tambe a scoge pa continuidad y experiencia pasobra ambos cartera ta esnan mas afecta door di e pandemia y e retonan lo ta grandi. E experiencia di ultimo añanan ta hopi necesario den e temporada nos dilanti.
Sr. Guillfred Besaril di Partido MEP: Minister Plenipotenciario na Hulanda. Especialmente den e negosacionnan cu Hulanda y proceso di leynan di Reino, nos mester awor di continuacion. Su nombracion ta cana un otro procedura y lo huramenta un dia despues di e ministernan.
Pa Parlamento:
Presidente di Parlamento ta sr. Edgard Vrolijk di Partido MEP, di profesion un docente y tambe un hurista, cu conocemento di nos Constitucion y reglanan y cu experiencia den Parlamento. E lo sa di guia nos Parlamento na forma fuerte e siguiente 4 añanan.
Cu un orguyo inmenso mi ta presenta Aruba Gabinete Wever-Croes 2, e Gobierno cu pueblo a scoge pa goberna nos Pais. Mi ta felicita tur colega minister y parlamentarionan nobo y mi ta desea boso hopi exito den realisa e trabounan den bienestar di e ciudadanonan di nos pais”.
Apesar cu e occasion ta uno hopi importante y di hubilo pa henter nos pais, debi na e situacion di Covid, lo mester hasi e huramentacion diferente. E lo tuma luga na Cas Ceremonial di Gobernador y lo wordo transmiti. Despues lo bay Bestuurskantoor y cuminsa traha mesora pa e prome Conseho di Minister. Conseho di Minister nobo lo aproba e nombracion di Minister Plenipotenciario, pa despues e tambe por huramenta.
1 comment
[…] Source link […]