Den un accion rapido diamars mainta, autoridadnan a drenta den accion despues di a localisa un cargamento di substancia ilicito na e costa pariba di nos isla. E hallazgo a tuma luga den e area conoci como Colony, den cercania di e anker grandi.
E suceso a inicia rond di 6:00 di mainta, ora cu Central di Polis a ricibi un notificacion indicando presencia di un boto sospechoso y locual tabata parce bultonan di droga plama na e sitio. Mesora a activa un operacion cu a involucra unidadnan di Polis di San Nicolas y e departamento di Crimen Organisa (UGC).
Evidencia localisa
Na yegada di e oficialnan, a topa cu un boto cu un solo motor banda di e costa. Durante e inspeccion den e area, e agentenan a confirma e sospecho inicial: a localisa varios bulto di droga, purunnan cu substancia ilicito y tambe varios pakete los cu tabata plama den e sitio.
Tanto e embarcacion como e mercancia y otro articulonan relevante pa e investigacion a keda confisca door di e departamentonan concerni pa un analisis mas profundo.
Investigacion en curso
E caso actualmente ta den pleno investigacion bao mando di e unidadnan specialisa. Autoridadnan a informa cu no ta descarta cu den e proximo oranan of dianan por bin detencionnan relaciona cu e cargamento aki, mientras ta purba determina e origen di e droga y e personanan involucra den e transporte.
Apelacion na comunidad
Cuerpo Policial Aruba (KPA) ta recorda e ciudadano cu nan cooperacion ta fundamental pa combati e tipo de crimennan aki. Si cualkier persona tin informacion cu por yuda aclarea e caso aki, por yama e Tiplijn di Polis na 11141. E anonimidad di e informante ta keda 100% garantisa.
