Djawebs último Defensa i Damen Workboats a firma un kontrato pa konstrukshon di tres boto nobo di patruya di tamaño mediano pa Wardakosta di Karibe Hulandes. E kontrato a keda establesé siguiendo un prosedura di destaho. E cutternan nobo lo reemplasa esunnan aktual den Karibe kual ta den uzo pa mas di 25 aña. Ta antisipá ku e cutternan nobo lo ta operashonal na kuminsamentu di 2029. E cutternan ku Defensa ta kumpra pa Wardakosta lo ta responsabel pa entre otro vigilansha, detenshon i asistensha marítimo riba laman den e parti di Karibe di Reino. Esaki ta inkluí tareanan di polis, kòntròl di frontera, patruyanan i operashonnan di búskeda i reskate riba laman. Botonan mas grandi i moderno pa Wardakosta E cutternan aktual, Jaguar, Panter i Poema a drenta den servisio na fin di añanan 1990. E botonan akí di Damen di e marka Stan Patrol 4100 ta hasiendo trabounan konfiabel pa añanan. Sinembargo debí na nan edat, mantenshon i gastunan ta birando muchu haltu. Pesei nan lo ser reemplasa pa un generashon nobo di botonan di patruya. E cutternan nobo di e marka Stan Patrol 5009 ta aproksimadamente 50 meter largu loke ta hasi nan mas grandi ku esunnan aktual. Esaki ta importante debí na e kondishonnan tin biaha ekstremo riba e laman di Karibe. E botonan nobo tambe lo ta ekipá ku sensornan moderno, manera radar avansá i kámaranan infrakòrá. Esaki ta permití e tripulashon mantené un vigilansha efektivo hasta durante oranan di anochi òf na momento ku tin mal visibilidat. Esaki ta oumentá e efektividat operashonal di Wardakosta lokual ta fortalesé su abilidat pa ehekutá su tareanan. Botonan ku ta interseptá mas grandi i mas lihé Banda di e cutternan, Damen ta suministrando tambe kuater boto pa interseptá. Kada cutter lo tin un di e interseptornan akí na bordo. Nan ta destiná pa interseptá botonan di kontrabanda rápido, e asina yamá ‘gofast’. E ‚go-fast‘ nan hopi biaha ta ser uza pa transporte di droga den Karibe. Tambe lo tin un boto pa interseptá èkstra disponibel pa rotashon di entrenamentu i na momento di mantenshon. E botonan nobo akí lo ta mas grandi ku esunnan aktual i pesei nan lo mantené nan velosidat muchu mas mihó den olanan haltu. Ku e yegada di e cutters i e botonan pa interseptá nobo Wardakoksta ta adkiriendo ekiponan moderno ku ta mihó adaptá na su tareanan.
Cutternan nobo pa Wardakosta
