Minister di Salubridad, Asunto Social, Cuido di Adulto Mayor y Maneho di Adiccion, Mervin Wyatt-Ras, a expresa su felicitacion na Stichting HUNTO pa e importante logro di realisa nan proyecto di un trailer movil cu lo bay riba caya pa brinda sosten y asistencia na personanan cu ta lucha cu problema di adiccion na Aruba.
Durante un anochi special organisa pa presenta e proyecto, minister Wyatt-Ras, hunto cu representantenan di su ministerio, a participa den e evento unda Stichting HUNTO a comparti e trayecto cu a hiba na realisacion di e iniciativa. Na principio solamente un grupo chikito di hende tabata kere den e idea, pero cu perseverancia y compromiso, e proyecto a logra bira un realidad.
E trailer movil lo permiti cu Stichting HUNTO por acerca mas na e comunidad, ofreciendo guia, apoyo y informacion directamente na personanan cu tin mester di ayudo.
Minister Wyatt-Ras a enfatisa cu un di e aspectonan mas importante pa organisacionnan por obtene fondo ta cu nan administracion financiero ta na ordo. El a indica cu den e caso di Stichting HUNTO, e fundacion a cumpli cu e rekisito aki dor di tene nan jaarrekening bon organisa y transparente.
E minister a expresa su aprecio pa e trabou importante cu Stichting HUNTO ta haci den comunidad y a anima nan pa sigui traha na fabor di personanan cu ta enfrenta desafio cu adiccion.
