Den boca di pueblo, ora un persona tin sintomanan respiratorio manera tos, nanishi ta core, dolor di garganta of kisas keintura, hopi biaha nos ta bisa simplemente: “mi tin griep.” Pero den realidad, kico ta causa loke nos ta yama griep?
E termino “griep”, manera cu pueblo ta bisa, ta mas bien un manera general pa referi na presencia di sintomanan respiratorio. E sintomanan aki por wordo ocaciona pa diferente tipo di virus. Entre esunnan mas comun tin influenza, parainfluenza, RSV (Respiratory Syncytial Virus), rhinovirus, y tambe COVID-19. Esaki ta e motibo pakico un persona por haya griep mas cu un biaha den e mesun aña. Durante aña, diferente virus respiratorio ta circula den comunidad, y cada un di nan por causa sintomanan similar.
Riba e pregunta si COVID ainda ta existi, e contesta ta si.
COVID ainda ta presente y ta causa sintomanan di griep serca esnan cu bin den contacto cu e virus, mescos cu e otro virusnan respiratorio. Awor aki, COVID ta wordo considera como un virus respiratorio mas den e grupo cu ta ocaciona sintoma di “griep”. Pa e motibo ey, test pa COVID no ta wordo haci mas manera antes pero solamente riba indicacion, pero atraves di DVG su sistema di vigilancia cu ta monitor presencia di malesanan circulando na Aruba COVID su presencia ainda ta wordo detecta.
E recomendacion pa personanan den grupo di riesgo, manera adulto mayor di 60 aña y esnan cu enfermedad of condicionnan di salud ta sigui igual. Pa nan proteha nan mes contra influenza y COVID door di vacuna. Consulta cu bo dokter di cas si bo tin duda, pasobra e virusnan aki ta sigui causa internacion den hospital y complicacion serio principalmente cerca esnan cu un salud fragil.