DdPiD den koperashon ku TCB ta lansa un mapa nobo pa kaminata den siudat

Direktorado di Planifikashon i Desaroyo (DdPiD) den koperashon ku Tourism Corporation Bonaire (TCB) dia 1 di sèptèmber 2021 a lansa un mapa nobo pa kaminata den sentro di siudat ‘Kaminata Históriko Kralendijk’. E mapa nobo pa e kaminata den sentro di siudat akí ta un mapa mas informativo i mas interaktivo ku esun anterior. E mapa nobo ta kontené tur e partinan históriko mas importante ku nos bishitantenan por mira i siña tokante di nos kapital, Kralendijk.

Meta di e Kaminata Históriko Kralendijk ta pa informá nos bishitantenan tokante nos ophetonan históriko den sentro di Kralendijk. Di e manera aki fásilmente e turista riba su mes por eksplorá e siudat.

En total a aktualisá kuater mapa di den sentro di siudat: dos den Parke Wilhelmina, unu na Ofisina di Turismo i unu na La Terrazza Shopping Mall. E mapa ta mustra en total 28 sitio interesante pa bishitá. Esakinan ta konsistí di edifisio históriko, museo i monumentonan. Banda di esei tin un leyenda di tur e fasilidatnan den sentro di siudat, manera ATM, banko, botika, pòmp di gasolin, warda di polis, supermarket, hospital, punto di informashon pa turista i mas. Banda di e aspektonan akí e nòmbernan di kaya tambe ta visíbel pa hasi mas fásil pa sigui e ruta deseá.

Pa duna mas tantu informashon balioso posibel i hasi mas fásil pa e usuario por eksplorá tur kos, dentro di poko lo tin un foyeto disponibel den un baki spesial bou di e mapanan. Esakinan ta grátis pa tur hende ku kier un foyeto di e Kaminata Históriko Kralendijk. E foyetonan aki ta optenibel tambe na Ofisina di Turismo . 

DdPiD ta hopi kontentu ku renobashon di e mapa di siudat i ta sigur ku esaki lo tin un balor agregá pa nos hendenan lokal i pa esnan ki t bishitá Boneiru.