Sra. Attje Kuiken, miembro di Tweede Kamer pa PvdA, a wòrdu elehí pa su frakshon komo nan lider di Frakshon nobo. Despues ku siman pasa sra. Lilian Ploumen a anunsiá di retirá komo lider di Frakshon i miembro di Parlamento, djabièrnè último frakshon di PvdA den Tweede Kamer mester a elehí un lider di frakshon nobo.
Attje Kuiken ta desde 2006 den Tweede Kamer pa PvdA i aktualmente ta bosero den Komishon di Asuntunan di Reino pa su Partido.
Attje ta konosí pa ta un parlamentario eksperensia, respetá, kritiko i ku su kurason na bon lugá. E ta un luchadó ferviente den Tweede Kamer pa nos Islanan den Karibe, pero muy en partikular Bonaire, kual e ta bishitá frekuentemente tambe den su tempu liber.
Attje en general ta lucha pa e gremio margina k’un enfasis riba oportunidat igual, kombatí pobresa i derecho di mucha!
Partido Demokrat ta rekonosé un aliado den Sra. Attje Kuiken pa trese e doló nan di Bonaire riba agènda na Den Haag. Na nòmber di Pueblo Boneriano, Partido Demokrat kièr felisitá Sra. Attje Kuiken ku e reto aki i ku e por konta ku sosten di Partido Demokrat den tur kos na interes di nos Pueblo i esnan marginá den komunidat!
