BonaireFeatured

Despensa Hulandes den kolonia Hulandes o Hipokresia Hulandes

Despensa Hulandes Den Kolonia Hulandes O Hipokresia Hulandes

Honorabel Prome Minister Rutte, presidente I miembronan di Parlamento I Senado Hulandes,

Nos a tuma nota di boso intenshonan pa finalmente konfesa I admiti boso krimenan kontra humanidat pa ultimo 400 anjanan di sklabitut, trafikashon di esklavonan I kontinuashon di kolonisashon di nos ansestornan I nos mes den presente. Kon bo por atmiti boso komplisidat pero ta ninga dekolonisashon I derecho di outodeterminashon na e desendientenan, e diaspora di nos ansestornan dehumanisa, e viktimanan di boso ekonomia kriminal inhumano.

I e deskulpanan no ta nada mas ku propaganda den un intento pa patronisa I desvia e atenshon di prinsipalmente e liderazgo Karibense liber ku ta aspirando reparashon pa e atrosidatnan komete I nan efekto riba e generashonan ku a sigui, origina pa kolonialismo.

Kon ta posibel, hon PM Rutte, ku abo ta konfesa di ta heredero di bo gobiernonan anterior krimenan komete kontra humanidat na nos ansestornan, I abo ta kontinua ta kometiendo e mesun krimenan na e desendientenan I riba bo mes ta absolve I libra bo mes di e krimenan aki dor di un despensa? Esey ta di berdat un despensa, hon PM Rutte?

Nos sa ku abo no tin niun idea pakiko bo ta pidi despensa pasobra abo a wordu nega bo historia, bo a wordu intenshonalmente mis-eduka di bo pasado pa abo kontinua sin remordimiento bo ekonomia basa riba rasismo. E ku a trese bo boso “Siglo di Oro”, a hiba boso di un pueblo piskado insignifikante na un di e nashonan mas riku na mundu, pero a bira pirateria, kontrabanda I sklabitut I destrukshonan di nashonan pa otronan, kual modelo boso a kontinua ku ne modernisa den siglonan 20 I 21.

E asina-yama despensa di boso ta inaseptabel pasobra boso gobierno atrobe a sali pa presenta un otro propaganda enganjoso na nivel-mundial mientrastanto ku boso ta kontinua kolonisando nos teritorio. Boso gobierno su akshonan, desishonan, leynan, I manehonan dirigi na nos pueblo Boneriano to konsisti di violashonan di nos derechonan fundamental I a resulta den un rekolonisashon ku ta violando artikulo 1, 55, 73 I 103 di e Charter di Nashonan Uni I resolushonan 742, 747, 945, 1514 I 1541 ku ta afirma e derecho inalienable di outo-determinashon di e pueblo Boneriano. Boso gobierno sistematikamente a usurpa diferente di nos pueblo Boneriano su instrumentonan legal: Charter di Nashonan Uni, Deklarashon di Deskolonisashon di Nashonan Uni, Konvenio Internashonal di Derechonan Sivil I Politiko, Konvenio Internashonal di Derechonan Ekonomiko, Sosial I Kultural, Konvenio Internashonal riba Tur Forma Di Deskriminashon Rasial,  Deklarashon di Nashonan Uni di Pueblonan Indigino.

1955… Boso a burla na esena mundial Nashonan Uni, I a kontinua kometiendo e mesun krimen ta pesey nos ta den e situashon aki awe pa e mentira Hulandes di mas grandi den historia. Kaminda ku na 1955 Minister di Relashonan Eksterior di Hulanda Sr Johan Beyen asisti pa e Prome Minister di Antia Sr Jonckheer a enganja Nashonan Uni ku nan ta representa e hendenan liber di Antia Hulandes, I asina Hulanda a wordu absolve di su obligashonan pa raporta I a kita nos for di lista Teritorionan-Sin-Propio-Gobernashon (TSPG). Nos nunka a wordu dekolonisa I nunka tabata ni igual ni liber. 

1863….. Hulanda komo un di e ultimo nashonan ku nunka kier a laga bai o aboli sklabitut boso a burla di mundo..  a bisa mundo ku boso a aboli sklabitut, mientrastanto boso gobierno a traha ley pa mantene e asina yama esklavonan-liber, nos ansestornan pa ley kaptivo I trahando pa e mesun donjo di katibu  riba e mesun plantashi… a kita e kadena for di nan enkel transforma esakinan den ley I kadena mental te ku awe.

Nos tur sa ku ley di abolishon di trafikashon di esklavo na 1814 I despues e ley na 1818 a hasi partisipashon un ofensa kriminal a hiba esaki na deskushonan kontinou den boso parlamento. Pa mas ku mitar siglo, nan a debati no pa keriensa den humanidat o sintimentu di kulpa riba e forma di komersio inhumano aki, pero komo un defensa di e rasonamento Hulandes ekonomiko pragmatiko, kondenando sklabitut den teoria, pero permitiendo esaki den praktika te na 1863 I despues. I te ku awe tur bo gobiernonan a tene boso I nos hendenan den un estado di dissonansia kognitivo pa medio di manipulashon kolonial, kultural, edukativo I legal, nengando e hecho ku boso gobierno tabata un di kolonisado di mas kruel di historia di mundu. 

Den luz di e kabinete su rekonosementu ofisial di krimenan kontra nos ansestornan I asina aseptando e reponsabilidat di ta e kontinuashon di boso anterior gobiernonan krimen rasista I ekonomiko komete kontra nos, e desendientenan di e viktimanan, nos lo kier a pidi bo karedisamente lo siguiente:

Pasobra bo gobierno ta parse no ta den estado-mental pa rekonose ku boso ta kontinuando kometiendo e mesun krimenan, bo deskulpa ta hypokresia. Nos lo kier hasi  abo I bo gobierno e mesun simpel pregunta manera e prome presidente di boso prome asamblea nashonal, durante e debate konstitushonal di Batavia, Sr Pieter Paulus “apostel di humanidat” a puntra na 1796: “Den ki manera tur ser humano por wordu konsidera igual?”

E mesun pregunta aki ta permanese awe, 19 di desember 2022, 225 anja despues: “ Den ki manera – nos asina yama “partnernan-di-Reino” , ku boso a aneksa resientemente na October 10, 2010, re-okupa, re-kolonisa, I ankra den boso konstitushon bao di derechonan desigual kontra nos deseo, – por wordu konsidera humanonan igual?”

Finalmente, nos lo no asepta ningun despensa mientrastanto ku bo ta kontinua ta kolonisando nos. Nos ta pidi bo karesidamente pa stop di ta komplise ku kontinuashon di kolonialismo Hulandes, deklara komo krimen kontra humanidat.

Related posts

Prome Minister Evelyn Wever-Croes: Diahuebs 15 di juni, Sintonisa ‘Periodista pa un Dia’

EA News Author

De schakel aruba a reuni cu minister di enseñansa y deporte

EA News Author

September ta luna di Monumento

EA News Author

Leave a Comment

Whatsapp Message