Parlamentario drs. Mervin Wyatt-Rasa a tuma nota di diferente combersacion cu formado Evelyn Wever-Croes tabatin cu departamentonan, entidadnan, organisacionan y profesionalnan riba diferente tereno. Despues di e combersacionnan cada ken a sali bisa den prensa ki tema o asunto a keda discuti. Wyatt-Ras ta spera cu locual e diferente instancianan y organisacionnan a trece padilanti e biaha aki si ser ehecuta den e gobernacion siguiente. E ta referi en especial na e area social. Segun Wyatt-Ras gobierno no a logra e resultadonan desea pa loke ta trata sector social. Por menciona e ley di castigo minimo di 5 regel cu Wever-Croes a priminti di pasa den 6 minuut den Parlamento y e plan di crisis social cu no (taba)tin e resultado priminti.
Wyatt-Ras ta trece padilanti cu por constata cu durante ultimo tempo casonan di hobennan meti den actonan di violencia, maltrato y hasta asesinato ta aumentando. Aki ta trata di hobennan di entre 15-19 aña. Ademas tin e preocupacion rond di aumento drastico di casonan di abuso sexual di mucha. Wyatt-Ras ta menciona ehempelnan. Dia 26 april 2019 amigo di cas di 36 aña di edad a viola mucha di 12 aña na cas na Hooiberg. Dia 29 april 2019 ta ser notifica cu welo a abusa di mesun nieta. Dia 4 di juni 2019 a ser publica cu homber naci na Jamaica a viola mucha muhe di 24 aña y cu tata di e victima a bai dia 30 di mei na flamboyantstraat pa regla cuenta y a kap un di e abusadornan cu machete te cu el a fayece na hospital. Un otro caso ta na september 2019 cu’n homber di 52 aña cu ta traha na DOW a keda deteni. Cu pickup di trabou e tabata hiba e muchanan di 14,11,8 aña y abusa di nan. E muchanan tabata nieta y subrina di casa di e abusado. Ademas por menciona e caso di abuso di e menor di 12 aña dor di un chauffeur di bus di cual por a tuma nota cu tata di e victima a dicidi di pone fin na su bida. Vocero di cuerpo policial na mei 2019 a trece padilanti cu tin cantidad creciente di casonan di abuso di menor y cu entre 1 di januari-30 di april 2019 tabatin 31 denuncia. Ta keda un reto pa e casonan aki cana nan caminda pa Ministerio Publico paso di e casonan aki tin cu convence OM pa por bai over na detencion. Hospital tambe den e periodo desde 2018 a trece padilanti cu tin un caso pa siman. Despues a bira 2, 3 y awor hasta 7 of mas caso pa siman.
Prome cu esaki na anja 2017 momento cu gobierno di MEPORED a bin na mando, e gobierno aki a trece padilanti cu tin un crisis social. A usa un caso den cual dos mucha chikito a perde nan bida na man di nan padraso abusador y nan mama. A lanta un fondo di crisis social di 38 miyon florin y diferente instancia y fundacionnan lo mester a haya ayudo financiero y pa medio di proyecto pa disminui y preveni abuso di menor. Sinembargo e cantidad di casonan a sigui subi. Ademas e casonan di hubentud awor ta mas severo manera di agresion y asesinato cu arma.
Djies pone placa y priminti no ta suficiente segun Wyatt-Ras, paso tin hopi instancia ta keha cu nan no a haya e ayudo cu nan a spera y ser priminti for di e fondo di crisisplan. Den e ley di Codigo Civil cual a ser aproba na 2016-2017 ta trece dilanti cu tin un meldpunt na unda muchanan cu ta ser abusa sexualmente por acudi. E meldpunt aki cu a bira SOSTENEMI no a wordo fortifica manera debe ser. E sistema di registracion no a ser regla dor di cual no tin bista riba e cantidad preciso di caso ni na unda e casonan a ser referi. E cooperacion entre instancianan tampoco no a mehora manera mester ta. Ainda clientenan ta keha cu nan ta ser manda di cashi pa muraya pa busca yudansa. Casonan ta keda pega y e clientenan no ta sigui haya yudansa manera cu nan a spera di haya. Tampoco no a baha e listanan di espera na diferente instancia manera inicial tabata e meta di e fondo aki. A nombra entre 50-60 contractanten pa por alivia esaki, sinembargo instancianan a duna di conoce den reunion cu Parlamento cu nan ta desea cu nan empleadonan ta cai den nan propio presupuesto y no den presupuesto di e fondo di crisis. Instancianan a indica alabes cu ainda nan tin dobbel tarea, paso ora nan no por referi cierto caso, e caso ta serca nan instancia y e tempo ta bai a costo di otro clientenan. E coordinacion di e casonan den sentido di ken ta haci kico pa por dividi of parti e trabou pa e por ta mas efectivo pa e cliente, tampoco ta un reto. Pa loke ta trata e “sighns of safety” of e safety code, por bisa cu el a ser introduci na ultimo momento den tempo di eleccion pa cumpli cu promesanan haci na veld social. Por nota cu diferente profesional ta hayando curso/upgrading pa cu esaki, aunke tin keho di profesionalnan cu esaki no ta bai manera cu mester ta. Eynan tambe mester di cierto ahustacion. E “bottleneck” ta keda e cooperacion entre instancianan y profesionalnan clave cu no ta manera cu mester ta. Si no atende cu dicho cooperacion lo no logra cambionan desea. Wyatt-Ras ta spera tambe cu e gobierno nobo dedica mas atencion na e centronan di cuido pa muchanan y hobennan. Pa loke ta trata e kindercentra ta di lamenta cu ainda e ley aki no a ser implementa despues cu gobierno di AVP, den persona di minister Michelle Hooyboer-Winklaar a presenta e ley aki y Parlamento a aprobe na anja 2017, sinembargo te ainda e no a bin na vigor. Pa loke ta Trai Merdia pa muchanan di skol basico y esun di hobennan ta spera cu e biaha aki si nan lo por haya mas atencion. Netamente den e situacion den cual hobennan ta manifestando problema cu agresividad y ta vulnerable pa cai den situacion di abuso/maltrato ta urgente pa regla bon acohida pa mayornan cu tin falta di un network social y/of ta traha durante oranan largo por haci esaki trankil, cu e confiansa cu nan yiunan ta bon cuida.
Un biaha mas ta di lamenta cu a inverti 38 miyon cu no tabatin e resultado desea.