Politica

Durante siman di celebracion di Dia di Betico: Colegio Hilario Angela Na San Nicolas Contento Cu Bishita Di Prome Minister


ORANJESTAD,Aruba

Prome Minister Evelyn Wever-Croes:

Ta hopi bunita pa mira e entusiasmo, alegria y especialmente e interes cu muchanan di scol tin den historia di e gran lider y luchador di nos Status Aparte, Gilberto François ‘Betico Croes’. Prome Minister Evelyn Wever-Croes desde dialuna a cuminsa bishita algun scol na Aruba. Diaranson merdia, Prome Minister a bishita e scol na San Nicolas, Colegio Hilario Angela. Muchanan di klas 6 tawata impresiona cu detayenan di Betico cu nan no tawata conoce prome. 

Den cada bishita, Prome Minister ta haya preguntanan, di cua e ta expresa di ta hopi fuerte biniendo di muchanan asina jong. Un pregunta cu tur dia e muchanan a puntra ta, ‘Cua ta e conseho mas importante cu Betico a duna’. Prome Minister a enfatisa cu pa Betico estudio tawata hopi importante. Betico semper a conseha su yiunan y sobrinonan y tur mucha pa nan keda studia y haci nan best na scol pa asina nan logra cosnan grandi. Educacion ta habri posibilidadnan grandi. ‘Be the best that you can be’ ta e conseho di mas grandi cu nos por duna nos yiunan y nos muchanan. 

Algo cu a yena Prome Minister cu hopi emocion ta un presentacion riba e screen Prowise cu klas 6 di Colegio Hilario Angela a duna. Y na final di e presentacion nan a pone e cantica di yiu mayor di Betico Croes, esta Guisette Croes, ‘Algo di mi a bay cu bo Papi’. Esaki sigur tawata un momento na unda tur presente a para keto pa scucha y wak e video completo. Prome Minister emociona a gradici e klas y docentenan pa e detaye bunita aki. Betico Croes no a lucha pa su mes. El a lucha pa su pueblo. E mes no a wak e fruta di su lucha. 3 ora prome cu Status Aparte, Betico a haya un accidente y a bay den coma y 11 luna despues el a fayece sin mira Status Aparte.  

Ta importante pa nos sigui conta nos muchanan e historia di Betico Croes. Pa semper nan ta gradici na dje pasobra ta ‘Danki na Dje’, despues di lucha duro, entrante 1 di januari 1986, Aruba a logra Status Aparte. 

Prome Minister a gradici e Cabesante di scol, tur docente y docentenan di klas 6 pa e tempo cu nan a pone pa siña e muchanan tocante di Betico. Tambe Prome Minister a invita tur mucha pa asisti na e Manifestacion Cultural diabierna awo, 24 di januari di 7:00 pa 10:30 PM na Plaza Libertador G.F. Betico Croes.

Related posts

Huramentacion miembro nobo corte comun di husticia

EA News Author

Minister Maduro a cera conoci cu IMF su ‘Mission Chief’ nobo pa Aruba

EA News Author

Parlamento ta trata e ley pa baha e tarifa di impuesto riba importacion di material di construccion y un cambio den e ley di comision di divisa pa exonera Estado Hulandes

EA News Author

Leave a Comment