Ta negociando den e cuadronan di e acuerdo cu Hulanda y di Parlamento di Aruba
Diahuebs mainta 30 di januari a tuma luga un encuentro publico di Parlamento
riba e tema di e situacion actual di e Rijkswet Aruba financieel toezicht (RAft).
Durante e encuentro Prome Minister Evelyn Wever-Croes a duna un splicacion y actualisacion
riba e RAft splicando e origen y unda Aruba ta para na e momento aki.
Historia
Prome Minsiter durante e encuentro a conta e historia di e leynan desde comienso pa asina e
parlamentarionan nobo por tin e informacion completo. E mandatario principal a splica riba e
situacion cu Aruba tawata aden durante e pandemia unda cu gobierno a wordo forsa pa acepta
cierto conceptonan di ley pa por a haya placa. Aruba e tempo ey si a pone e condicion cu e leynan
mester bay Raad van State prome ken na su turno a duna conseho basta negativo riba esaki.
Tambe Parlamento di Aruba tawata contra, tratando e tempo ey di fraccionnan di MEP, AVP y
RAIZ. Pa e motibo ey a sigui negocia cu Hulanda pa bin na algo miho y mas flexibel cual ta loke
ta andando actualmente.
Ta negociando den e cuadronan
E importancia di e reunion informativo di diahuebs mainta tawata pa Prome Minister comparti
unda Aruba ta para na e momento aki. Aki e mandatario a indica cu, ainda no tin e conceptonan
den texto y ta depende tambe di e raport di IMF cu lo keda cla pronto. Na e momento ey lo por
duna Parlamento mas informacion. Si Aruba ta negociando den e cuadro di e acuerdo, e
bestuurlijk akkoord cu a yega cu Secretario di Estado van Huffelen na juni 2024 y tambe den e
cuadro di e diferente mocionnan cu Parlamento a duna.
Iniciativa Fraccion AVP
Prome Minister a indica cu di su parti el a pidi fraccionnan duna indicacion unda nan ta para cu e
leynan aki. Aki a tende cu un fraccion ta propone un Frente Nacional. Pa esey fraccion di AVP a
duna mas informacion como nan a bin cu e iniciativa di un Frente Nacional splicando kico nan lo
kier. Prome Minister a subraya e importancia pa sa ken lo lidera esaki y cua lo ta e posicion di
fraccion di AVP riba esaki unda e fraccion no a duna e informacion riba esaki.
Fraccion AVP y PPA ta contra pa sigui negocia
Esaki ta haci cu e mandatario lo sigui negocia, pa por saca e miho acuerdo posibel y unabes cu tin
un negosacion concreto, lo trece esaki pa Parlamento ken lo tuma decision. Fraccion AVP y PPA
a indica di ta contra pa sigui negocia y fraccion di FUTURA, manera indica durante su campaña ta
na favor pa sigui negocia.
“Di mi parti mi a cumpli di duna informacion. Mi a pidi Parlamento pa nan duna mi mas
informacion y tawatin silencio. Mi a informa nan tambe cu si mi no haya otro notificacion di
Parlamento, mi ta sigui negocia den cuadro di e mandato otorga na mi pa e Parlamento anterior. Si
e Parlamento actual kier cambia e mandato nan por haci’e durante un reunion publico y informa
gobierno.
Mientrastanto nos ta sigui negocia pasobra esaki ta den interes di henter Aruba pa yega na un
miho interes di e prestamo. Si stop di negocia awor y warda te ora tin un gobierno nobo no ta den
e miho interes di Aruba. A trata di un bon reunion unda hopi informacion a wordo duna. Mi ta
aprecia cu Parlamento tawatin e interes den esaki y awor nos tin suficiente indicacion con pa sigui
cu e negosacionnan. Otro siman mi lo ta na Hulanda y lo continua cu e negosacionnan”, Prome
Minister a indica.