E votonan ta kontá i un biaha mas Boneiru a proba di ta un paraiso di buseo di klase mundial. Durante World Travel Awards nan a proklamá nos isla komo mihó destinashon di buseo di área karibense di aña 2025.
E premio akí ta un rekonosementu pa Boneiru su esfuersonan riba tereno di konservashon marino, ref di koral bírgen i eksperensianan inigualabel bou di awa, i ku esaki e ta fortifiká nos isla su reputashon komo un destinashon tòp pa sambuyadónan for di mundu henter.
Pa kaba komplementá e éksito akí, nan a nominá Boneiru tambe pa e mihó destinashon di buseo na mundu di aña 2025, un di e kondekorashonnan di mas haltu den e programa di World Travel Award.
“Nos ta sumamente honrá di por risibí e rekonosementu akí”, segun Elesiër Angel, direktor di Tourism Corporation Bonaire. “Boneiru su dedikashon na protekshon di nos medio ambiente marino i pa brinda eksperensianan di buseo eksepshonal, ta forma e núkleo di nos identidat. E premio akí ta un homenahe na nos komunidat, na nos partnernan i na e bunitesa natural ku ta hasi Boneiru úniko.”
E temporada mundial pa vota pa e kategorianan di “World’s Leading – Mihó di Mundu” ta kore di 6 te ku 26 di òktober 2025. Un invitashon ta bai na profeshonalnan di biahe, medionan di komunikashon i turistanan for di henter mundu pa depositá nan voto pa yuda Boneiru logra e kondekorashon di mas haltu akí.
Pa mas informashon òf pa vota, bai riba www.worldtravelawards.com.
