Si te aworaki Aruba a conoce Avestruz y Flamingo, na momento cu e siguiente investigacion, cu ta carga nomber di un mata tipico di aruba, bira conoci, e bom lo explota den DIP.
Pa algun siman of luna ta sperando e proximo paso cu autoridadnan ta bay tuma den un caso cu nan a bin ta investigando paralelamente cu esun di Avestruz y despues Flamingo. Pa algun aña caba Landsrecherche ta haya ayudo di funcionarionan di Hulanda cu a logra trece dilanti mesa berde e prome caso grandi di soborno den cual un politico activo, Paul Croes, tabata un di e sospechoso. E caso aki conoci como IBiS a bini dilanti mesa berde caba y Croes a wordo haya culpabel. Proximamente Hof lo trata su apelacion, fin di e luna aki. Pa loke ta trata e caso di Avestruz no a sera ainda y lo tin su caminda pa cana prome cu e keda cla y keda sera completamente.
Algun luna atras, net prome cu eleccion, autoridadnan a tira un entrada hudicial unda cu a bay cu parti di administracion y computer di tanto e director como di otro funcionario halto den DIP.
E maneho no tabata transparente ni conforme vision di Gobierno. Por corda ainda cu na final di aña pasa, inicio di aña tabatin hopi mal content na DIP. Trahadonan tabata sinti nan mes frustra y hinca den un skina pa cual a bati alarma. Nan no tabata di acuerdo cu tin un maneho stipula y e ultimo ex minister Marisol Lopez Tromp y Director Haime Croes di Infrastructura no a mantene nan mes na e first in first out y a benificia famia y amigonan. P’esey trahadonan no tabata kier coopera.
Tabatin masha hopi keho cu e director a haya un apoderacion pa hiba e maneho stipula pa Gobierno, sinembargo pueblo no a wordo beneficia cu esaki. Peticionnan di tereno no tabata wordo atendi pa periodonan largo. Unda cu e maneho ta keda stanka y ciudadanonan y comerciantenan ta keda perhudica.
Aunke cu e minister actual tin un bon vision pa dipolisa DIP y a duna e Director e poder aki pa restructura DIP pa duna e miho servicio na comunidad, e Director no a tuma esaki na serio y a keda hiba e maneho di minister nan aterior. Esaki ta pone cu e Director ta traha contra di maneho stipula pa ley y cu ta pone cu e Director no ta apto pa e puesto menciona
Hopi ciudadano ta puntra con a para cu nan peticionnan y nunca tabata haya contesta.
Otro informacion cu EA News a ricibi ta mustra cu tur e situacion desagradabel y cu kehonan cu a drenta cu tin den DIP ultimo lo por bay costa cabes di director, cu no a traha na beneficio di pueblo y interes general. Por corda ainda con den un declaracion duna, el a bisa cu proximamente no tin mas tereno disponibel. Solamente esnan cu a haci peticion te cu cierto aña lo por bini na remarca. For di e tempo ey caba, e Gobierno na mando a sinti cu algo no ta bon. Y e investigacion cu tin andando lo por saca hopi puito for di macuto.