Cu apertura di e aña parlamentario nobo 2026-2027, e lider di fraccion di Partido di Pueblo Arubano (PPA), Eduard Pieters, a resalta e importancia di e dia aki pa e democracia di e pais. E parlamentario a retira e compromiso di su fraccion pa mantene un trabou di control stricto riba Gobierno, basa semper riba documentacion legitimo y den defensa di e leynan di e pais.
Cu e eleccion di e mesun Presidente di Parlamento, Marlon Sneek, y e nombramento di Sra. Ruthleen Lindor como e vicepresidente nobo pa e periodo parlamentario aki, PPA ta prepara pa continua su labor di representacion y fiscalisacion den e organo legislativo.
Un compromiso cu firmesa pa salvaguardia e leynan y e pueblo
Pieters a enfatisa cu e rol principal di Parlamento ta pa actua como un
escudo protector pa e ciudadanonan y e orden constitucional:
Control riguroso: E fraccion di PPA lo sigui evalua e accionnan di Gobierno, basando nan mes unicamente riba documentonan oficial y veridico.
Proteccion constitucional: Mantenemento di e leynan y salvaguardia di e bienestar general di Aruba ta e peso y e autoridad cu e instituto di Parlamento ta carga den nomber di pueblo.
Den e plannan pa e aña parlamentario binidero, e lider di PPA a indica cu e fraccion lo enfoca intensamente riba e sector di enseñansa y, di manera special, riba e cuidado di e hendenan grandi (ouderenzorg).
Pieters a expresa su desacuerdo cu e manera cu e comisionnan a funciona den e periodo anterior, señalando cu den e Comision Fiho di Famia y Cuidado di hende grandi a yama solamente un reunion, unda cu tabatin apenas tres reunion di comision den henter e aña parlamentario tras di lomba. Segun e parlamentario, esaki ta un prueba cu ni e coalicion den Parlamento ni e gobernacion mes no ta dunando e prioridad y e atencion cu nos famianan y nos adultonan mayor merece.
Pa e aña nobo aki, PPA lo intensifica e presion pa garantisa cu e comisionnan ta reuni mas frecuentemente, permitiendo asina e acceso na
informacion adecua y oportuno:
Nos mester di e informacionnan corecto y na tempo pa ora cu nos trata e presupuestonan y leynan crucial pa e desaroyo di Aruba, nos por tuma decisionnan clave y vota na beneficio di e pais,” Pieters a declara.
E fraccion di PPA ta inicia e aña parlamentario nobo cu e meta pa exigi mas seriedad, atencion pa e temanan social di mas vulnerabel, y un berdadero compromiso cu e proceso democratico.