Bonaire Internacional

Elvis Tjin Asjoe ku yamada na supuesto analistanan polítiko : Usa tempu pa yuda konstruí Boneiru


Elvis Tjin Asjoe, lider polítiko di MPB, ta hasi un yamada serio na tur e supuesto analistanan polítiko ku ta kritiká na un manera destruktivo, pa usa nan tempu pa yuda konstruí Boneiru.

Tjin Asjoe a bisa semper tin gobernashon i tin oposishon, loke ta sano. Den un komunidat mester di krítika sano i ohalá tur krítika ta sano tambe.Sano ta nifiká, ku e krítika ta konstruktivo i no destruktivo i no di kinikini, loke ta nifiká ku ta bula riba tur kos pa kritiká.

Si mira bon último aki, segun Tjin Asjoe, ta mira ku tin sierto hendenan ta skohe pa kritiká tur kos di gobernashon. No tin algu ku ta tuma lugá ku ta dun’é e stèmpel negativo. Si e ta sali for di oposishon, ta algu di spera, ounke ta spera un oposishon konstruktivo. 

Tin sierto persona den komunidat ku ta yama nan mes analista polítiko i tambe tin frakshonnan ku a lanta den Konseho Insular, ku ta funshoná komo prùlebak di krítika di sierto hende, Tjin Asjoe a duna di konosé.

Tjin Asjoe: “Mi ke pa komunidat komprondé tambe ku tin hende ku tur siman di nobo ta trata di un manera òf otro di informá di e manera destruktivo kon nan ta mira kos. Si bo ta kritiká anto bo krítika ta sano pa konstruí, pa mi parti bo no kritiká tur siman, pero tur dia mes. Pero si bo krítika ta bira hopi dirigí pa bisa un gobièrnu i diputadonan kada bes di nobo pa bai kas, mi ta kere bo a pèrdè strea di nort. Bo mester tin un rabia i frustrashon interno den bo pa bah’é riba gobernantenan i sigur gobernantenan hóben.”

Tjin Asjoe a bisa, a bai asta asina leu ku e asuntu aki a bira un abuso di sierto persona ku ta mal usá nan pèn di tur dia sea pa skirbi kosnan tur siman i ta bati e gobièrnu na un manera destruktivo. 

Ami no por stòp nan, pero si pone nan dilanti un spil pa nan mira i reflehá pa e loke nan ta hasi ei, no por ta bon. Bo no tin e konsenshi ku nos ta bibando den un periodo di krísis i nos energia mester bai pa wak ku hende no ta muri di Covid i di hamber, òf kompanianan no ta muri pa motibu ku nan no tin sufisiente entrada pa mantené kabes riba awa, ta esei mester ta prioridat na e momentunan aki,” Tjin Asjoe a trese dilanti.

Pa esnan ku ta kritiká tur dia i tur siman, Tjin Asjoe ta pidi nan por fabor usa nan pèn no pa kritiká i filosofiá so i pa skucha nan mes tur siman na radio i pa mira nan mes tur siman na televishon, òf pa wak kuantu ‘likes’ nan a haña riba Facebook. Ban uni kabes i forsa pa nos tin un direkshon di desaroyo di Boneiru ku ta kana un kaminda na bienestar di e komunidat boneriano i nos mester di kada un di boso pa esei.

Un yamada Tjin Asjoe ta hasi na tur ku ke kritiká, sigui hasié, ban hasié konstruktivo i kaminda tin algu ku ta robes kuestion’é, pero no ta tur kos asina por ta robes den gobernashon? Ta tur diputado por ta malu asina? No tòg?

Pues un yamada serio na tur ku ta kritiká na un manera destruktivo, usa boso tempu pa yuda konstruí Boneiru. Si boso ke sigui tira piedra, no tin moda di hasi, nos no por stòp boso, pero nos lo krea un makutu hinka tur e piedranan aki aden i usa nan pa konstruí e Boneiru pa boso tambe biba bon den dje, Tjin Asjoe a bisa.

Related posts

Dutch Caribbean Nature Alliance ta finalisá Bishita di Trabou na Saba, Statia i Sint Maarten

EA News Author

Ciudadanonan mester tene bon cuenta riba e medidanan di emergencia

EA News Author

Minister di Enseñansa, Siensia, Kultura i Deporte (ESKD) Sr. Steven Croes a hiba un bishita na Instituto pa Formashon den Enfermeria (IFE)

EA News Author

1 comment

Leave a Comment