Dia 15 di November 2023, Oficina Central di Estadistica (CBS) a cuminsa cu e Encuesta di Entrada y Gastonan. Manera nos a menciona e encuesta aki ta encera 2 parti. Hogarnan participante ta wordo puntra pa contesta algun preguntanan tocante gastonan cu e hogar a haci durante e 12 lunanan cu a pasa prome cu e encuesta y hogarnan ta wordo pidi pa yena un Buki di Gastonan Diario pa un periodo di 2 siman.
Teniendo na cuenta e esfuerzo cu un hogar mester hasi pa participa na e encuesta aki, CBS a bin cu un incentivo pa hogarnan cu a participa exitosamente na e encuesta. Na final di e encuesta, e hogarnan aki a wordo puntra si nan ta desea di participa na un rifa cu tin como premio un bon di supermercado di Afl.100. Pa por participa, hogarnan a wordo pidi pa duna nan number di telefon. Ayera CBS a saca e prome 10 hogarnan ganador cu a participa na e encuesta den e luna di november.
Pa medio di e comunicado aki CBS ta anuncia e ganadornan di e prome periodo, manteniendo alabes e anonimidad di e hogarnan ganador. E 10 hogarnan ganado ta parti den e siguiente areanan di Aruba: 1 den Noord, 2 den Oranjestad, 2 den Paradera, 1 den Santa Cruz y 4 den San Nicolas.
CBS a tuma contacto cu e hogarnan aki pa asina nan por busca nan bon di supermercado. Na comienso di Januari 2024 lo saca e ganadornan di periodo 2, esta hogarnan cu a participa exitosamente na e encuesta den luna di december 2023. Di e manera aki CBS kier sigui incentiva hogarnan pa coopera cu e Encuesta di Entrada & Gastonan 2023-2024.