E siman aki ta kuminsá na Kòrsou e Enkuesta Adaptashon di Klima Kòrsou 2025, un kolaborashon entre Universidat di Kòrsou (UoC) i Vrije Universiteit Amsterdam (VU). E enkuesta aki ta parti di e programa internashonal di investigashon “Climate Adaptation Options Project” di e International Panel on Deltas and Coastal Areas (IPDC) Dutch Caribbean.
E meta di e investigashon ta pa komprondé mihó kon hende na Kòrsou ta eksperensiá e efektonan di kambionan di klima, manera kalor ekstremo, awaseru duru, tormenta i subimentu di nivel di laman, i tambe segun nan kiko ta e prekoushonan ku mester hasi pa prepará mihó pa futuro. E resultado lo kontribuí na Strategia Nashonal di Adaptashon di Klima pa Kòrsou.
E enkuesta lo wordu realisá dor di entre otro studiantenan di Universidat di Kòrsou ku a risibí entrenamento spesial, bou di guia di e organisashon di investigashon independiente: RE-Quest. Nan lo hasi entrevistanan kòrtiku (di mas òf menos10 minüt) na Papiamentu, Hulandés, Inglés òf Spañó, na luganan públiko manera supermerkado i sentronan komersial.
Tur informashon lo wòrdu tratá ku konfidensialidat i lo keda anónimo. E resultado lo wòrdu publiká solamente na forma di totalnan, den un rapòrt públiko disponibel pa tur ku ta interesá.
E ekipo di investigashon ta hasi un yamada na pueblo di Kòrsou:
“Nos ta hasi un yamada na pueblo di Kòrsou pa tuma un tiki tempu pa partisipá na e enkuesta. Bo partisipashon ta kontribuí pa prepará Kòrsou mihó kontra e efektonan di kambionan di klima,”
Pa mas informashon tokante e proyekto, por haña nos riba e página https://ipdc-climate-action.org/member/the-dutch-caribbean/
Press release: Re-Quest Research & Consultancy