Algun siman pasá Entidat Públiko Boneiru a anunsiá ku Direktorado di Planifikashon i Desaroyo (R&O) a kuminsá aktivamente ku tratamentu di e petishonnan di pèrmit ku pa hopi tempu largu tabata pendiente. Entretantu e promé resultadonan ta visibel i a aserká un parti grandi di e personanan ku a hasi petishon.
Den e anunsio anterior Entidat Públiko Boneiru a indiká di lo atendé ku prioridat ku e retrasonan i na mes momentu implementá mehorashonnan struktural pa den futuro evitá retraso. E proseso akí ta kana segun planifikashon. A manda e promé kartanan pa e personanan ku a hasi petishon, i entretantu hopi di nan a reakshoná òf a entregá dokumentunan adishonal. Di e manera akí kada biaha por kompletá mas fail.
Progreso konkreto
E sistema di traha den Direktorado di Planifikashon i Desaroyo a bira mas efisiente. A amplia e timnan i paso pa paso ta digitalisando e prosesonan di trabou, di manera ku por trata petishonnan mas rápidamente i mas mihó. Banda di esaki e empleadonan ta haña kapasitashon adishonal den komunikashon ku enfoke riba kliente i tratamentu di proseso.
Yamada na e personanan ku ta hasi petishon
Un biaha mas Entidat Públiko Boneiru ta enfatisá e importansia pa e personanan ku ta hasi petishon pa reakshoná na tempu riba kartanan ku nan haña i entregá e informashon pidí. Por evaluá solamente failnan ku ta kompleto. Si no entregá e dokumentunan ku falta na tempu, e ora ei no por tuma e petishon den tratamentu mas aleu.
“Nos ta realisá kon importante esaki ta pa hopi hende. Pa e motibu akí nos ta traha ku dedikashon kompleto pa trata kada petishon kuidadosamente i na mes momentu krea un mihó sistema pa futuro,” segun e direktor interino di R&O Ligwino Leito.
Mas informashon
Habitantenan ku tin pregunta tokante nan petishon òf tokante e trayekto ku ta andando, por tuma kontakto via directie_ro@bonairegov.com òf bishitá e wèpsait ofisial www.bonairegov.com.