Recientemente estudiantenan di Dance and Arts Dimensions Academy Foundation (DADA) a haci un bishita di cortesia na Gabinete di Minister Plenipotenciario di Sint Maarten, unda Minister Plenipotenciario drs. Gracita Arrindell y personal di gabinete a ricibi e delegacion durante nan bishita na Hulanda.
E bishita a sirbi como un oportunidad pa DADA expresa su apretacion na Minister Arrindell y Vereska Illidge pa e sosten y hospitalidad cu a wordo brinda durante e bishita di intercambio cultural di e academia na Hulanda na 2025.
Como gesto di gratitud, e delegacion a presenta ambos cu token di apretacion.
Durante e reunion, DADA tambe a duna un update tocante e logro- y éxitonan di e academia den e ultimo aña, incluyendo su compromiso continuo pa cultiva talento hoben atraves di artes escenico.
E delegacion a comparti puntonan sobresaliente di nan programa actual na Hulanda, cual ta inclui presentacionnan, como tambe actividadnan cultural y educativo diseña pa enrikece ainda mas e desaroyo artistico y exposicion internacional di e estudiantenan.
Minister Arrindell a elogia DADA pa su dedicacion continuo na empodera hubentud di Sint Maarten atraves di arte y cultura.
“Ta aliento pa mira DADA sigui inverti den e desaroyo di nos hendenan hoben mientras nan ta sirbi como embahadornan cultural pa Sint Maarten. Nan pasion, disciplina y creatividad ta un fuente di orguyo pa nos pais, y nos ta warda cu ansia riba nan éxito continuo,” Minister Arrindell a bisa.