Esaki ta e realidad di nos pueblo. Fin di luna un mama ta sinta cu su recibonan. Coriente, awa.
Huur of Hypotheek, supermercado. Prome e ta mira kico tin pa despues e dicidi kico e por paga.
Y si no ta yega, e ta bay pidi un areglo, prome cu e cuentanan bira un problema.
Asina miles di famia na Aruba ta biba. Cu disciplina, cu sacrificio, cu respet pa cada florin.
Awe, den Parlamento, mi a mira un gobierno cu ta haci net lo contrario. Nan ta gasta e placa
prome, despues nan ta bin pidi aprobacion pa placa cu nan a gasta caba.
E cambio di presupuesto aki mester a keda trata den juni, prome cu reces. E cambio a yega
Parlamento na augustus, y nos ta trate na november, ora e placa a wordo gasta caba. Di e forma
aki ta kibra transparencia y integridad y ta stroba parlamento di controla gobierno.
Un gobierno sin rumbo
Ministernan ta tuma decision sin un ley cu ta bisa ken ta encarga cu kico. Raad van Advies ta
bisa wederom, atrobe, cu ainda no tin un LIM nobo. Mientrastanto, e partnernan di coalicion ta
ataca otro den media. Esaki no ta goberna. Esaki ta muchachada politico. Minister-President,
stop e pleitonan, y pone atencion riba e dolor di pueblo. Pasobra e dolor di pueblo ta real. Nos
maestronan ta traha bou di presion, pasobra falta docente. Den nos bario, nos hobennan no ta
sinti nan sigur. Prijs di cuminda, gasolin y huur ta subi, y no tin plan di alivio.
Nos a mira caba unda esaki ta termina
Ora gasto ta core sin control y e debe ta subi, otro ta bin dicidi pa nos. Na 2015, Hulanda kier a
tuma control riba nos presupuesto, y e Minister-President di e tempo ey, Mike Eman, a bay den
welga di hamber. Ken a paga e prijs ey? Pueblo. Mi no kier esey pa Aruba atrobe.
Tin un otro caminda
E otro caminda ta simpel: comunica manera adulto y tuma decision. Asina nos a traha. Gobierno
tabata bin Parlamento na comienso di aña, meymey di aña y na fin di aña. Parlamento por a sigui
e placa henter aña. Awe, CAft mes ta confirma cu e finansa di Aruba ta den bon estado. Esey ta
resultado di disciplina, responsabilidad y integridad.
Un presupuesto ta mas cu un lista di gasto. E ta e plan di nos pais, e alivio di nos famianan, e
inversion den nos hobennan. Aruba mester un economia cu no ta depende solamente di turismo,
cu tin trabou pa nos hendenan. Un gobierno cu ta cuida su pais di berdad, cu tin plan contra
criminalidad. Pueblo merece un gobierno cu ta percura pa alivio real pa e famianan cu ta lucha
awe! Esey ta e trabou cu MEP ta cla pa haci. Nos no ta para aki pa grita. Nos ta para aki pa traha.
Bek na e mesa
E mama na su mesa di cushina no tin un presupuesto supletorio pa legalisa loke el a gasta caba. E
tin su recibonan, su disciplina, y su speransa cu mañan lo ta miho. Na e mama ey, mi kier bisa:
bo no ta bo so. E ta bo placa. Bo tin derecho di sa prome, y no despues. Gobierno no tey pa bo,
pero MEP si tey pa bo.
