Siman pasa lider di fraccion MAN-PIN, Giselle Mc William hunto cu colaborador di fraccion, Alvin Daal a tene un reunion di trabou cu e sindicato cu ta representa personal den enfermeria, CBV tocante e situacion di trahadornan den sector di cuido. Tambe a participa representantenan di sindicatonan di Aruba, resaltando cu e reto aki tin un dimension regional.
CBV a presenta un bista cla di e diferencianan salarial y e desafionan cu trahadornan di cuido ta enfrenta diariamente. Ta trata di condicionnan di trabou, falta di personal specialisa y un salida continuo di profesionalnan pa otro paisnan den Reino.
Durante e reunion, Fraccion MAN-PIN a presenta su analisis y varios opcion concreto pa yega na solucionnan realistich y duradero. E discusion a resulta den un intercambio constructivo tocante medidanan cu por mehora e situacion riba termino cortico y mediano.
Apesat di ta den oposicion, Fraccion MAN-PIN ta sigui tuma responsabilidad pa contribui cu idea, proposicion y solucionnan pa e problemanan cu ta afecta nos comunidad. Nos no ta limita nos mes na critica, pero ta traha tambe activamente hunto cu e diferente sectornan pa logra miho resultadonan pa nos pueblo.
Den e tempo venidero, Fraccion MAN-PIN y CBV lo sigui traha riba proposicionnan concreto pa mehora e condicionnan di trabou den sector di salud, reconoce e bunita profesion aki y corigi pa e ta mas atractivo pa nos hobennan.
