Fundacion Orguyo Aruba a ricibi e grato noticia for di nos oficina di abogado na Amsterdam cu e Advocaat-General a saca su conseho pa Hoge Raad mas tempran cu a ser anticipa na November ultimo.
Manera ya ta conoci, Fundacion Orguyo Aruba, a entama un caso contra pais Aruba na 2019 unda ta exigi pais Aruba pa caba cu discriminacion y habri matrimonio pa pareha nan di mesun sexo. Na 2020 fundacion Orguyo a gana e caso aki. Como cu e veredicto solamente a constata discriminacion door di Pais Aruba, sin un consecuencia legal directo, Fundacion Orguyo Aruba a bai den apelacion.
Riba 6 di December 2022 (net un aña pasa) Fundacion Orguyo Aruba a bolbe gana e caso. Aki si e hueznan di e Corte Comun di Husticia di Aruba, Curacao y Sint Maarten y di Boneiro, Sint-Eustatius y Saba (“Hof”) e jega na veredicto cu atrobe, Aruba ta discrimina ora ta nenga pareha nan di mesun sexo pa contrae un matrimonio y ta ordena pa habri matrimonio pa pareha di mesun sexo di biaha, pero cu e posibilidad prome cu e partido nan por bai den casacion.
Esaki Pais Aruba a escoge y na November 2022 a tuma lugar e proceso di casacion.
Awe nos ta contento di por comparti un actualicacion importante den e caso di igualdad matrimonial na Hoge Raad. E Advocaat-Generaal a duna un conseho positivo pa nos comunidad, consehando Hoge Raad pa nenga e peticion pa casacion, confirmando e veredicto duna pa Corte Comun di Husticia di December 2022.
Cu esaki un bloki mas di e muraya di desigualdad ta wordo kibra, sperando cu Hoge Raad lo sigui e conseho y tumba e muraya por completo abou! E fecha pa Hoge Raad duna su veredicto ta provisionalmente poni pa 31 mei 2024.
