Esaki ta e promé kas di kuido di grandi ku ta anunsiá infekshon i ta lanta e prekupashon nesesario pa lanta alerta den e situashon di Covid na Kòrsou. Manera e komunikado mes ta bisa, Birgen di Rosario ta un fundashon ku ta kuida hende grandi i nan ta konsiente di e riesgo haltu pa esnan di edat avansá.
Pa tal motibu, na Habaai den sekshon di Mispel/Mango ta sera bishita te ku 5 desèmber proksimo. Mientras no tin bishita, direktiva ta diskutí protokòl i proseduranan di siguridat i kuido ku e dòkter di kas di e instituto i tambe ekspertonan na GGD.
E fundashon alabes ta anunsiá ku e infekshon a tuma lugá te ainda solamente na Habaai. Demas departamentonan na Habaai ku no ta Mispel/Mango ta sigui tuma bishita normal konforme reglanan vigente. Tambe Nos Lanterno i Richardushuis ta sigui risibí bishita konforme e reglanan.
Manera menshoná te ainda, esaki ta e promé kas di kuido ku ta anunsiá infekshon. Na Betesda tambe tin informashon ku einan tin personal den kuido ku a keda infektá unda tambe tin hende di edat bou di kuido. Kortesia Vigilante Korsou.
