Lider di fraccion di FUTURO, Ruthline Lindor, a participa den e reunion di e Interparlementair Koninkrijksoverleg (IPKO) y a pone enfasis riba e deseo mutuo pa fortalece e union entre e islanan di Caribe y Hulanda. Segun e parlamentario, e boluntad pa cooperacion ta evidente na nivel strategico, pero e reto principal ta con traduci e intencionnan aki na accion operacional i resultado concreto.
Lindor a indica cu durante e reunionnan a wordo sondia posibilidadnan pa traha hunto riba puntonan specifico cu por beneficia tur cuatro paisnan den Reino Hulandes. Den esey, un di e aspecto cu, segun Lindor, a sobresali positivamente ta e presentacion di Departamento di Crisis Management Office (CMO) di Aruba.
Segun e lider di fraccion di FUTURO, Aruba por sinti orguyo di su CMO, cual a wordo presenta como un modelo regional. “Masha biaha tin critica cu CMO ta gastando hopi placa sin, pero ora crisis ta bati porta, ta cla cu tin un vision y structura profesional,” Lindor a señala. Delegacionnan di otro paisnan, segun Lindor, a mustra sorpresa pa e variedad di ‘tools’ y preparacion cu Aruba tin pa mitiga crisis.
Lindor a recalca cu CMO no ta limita su rol na Aruba so, sino cu regularmente ta comparti su experiencia y conocemento cu otro paisnan den region. Pa FUTURO, esaki ta mustra cu Aruba por contribui activamente na fortalecemento institucional den Reino.
Cuido di adulto mayor como reto comun
Un otro tema relevante riba agenda ta situacion di adulto mayor den Reino. Segun Lindor, crecemento di poblacion mayor ta un desafio no solamente pa Aruba, sino pa tur paisnan den Reino Hulandes. Desde 10-10-10 a wordo adverti cu presion riba sistema di cuido lo aumenta, pero segun e parlamentario, falta di accion structural a haci cu problema a crece mas rapido cu tabata anticipa.
“E cuido di nos grandinan ta un punto di preocupacion serio,” Lindor a expresa, añadiendo cu durante IPKO ta busca solucionnan conhunto pa aborda e reto aki. Reunionnan tripartito cu ta sigui lo enfoca riba cooperacion regional, particularmente entre islanan cu ta mas cerca uno di otro, pa comparti capacidad y recurso den sector di cuido.
Entre opcionnan menciona ta inversion den formacion profesional pa crea mas personal capacita pa traha den casnan di cuido. Segun Lindor, intercambio di conocemento y programa di capacitacion conhunto por yuda mitiga escasez di personal cualifica.
Di palabra pa implementacion
Lider di FUTURO a enfatisa cu acuerdo y declaracionnan cu ta resulta for di IPKO no mester keda riba papel. “Nos mester operacionalisa loke cu nos ta palabrando,” el a declara.
E tambe a reconoce cu e presencia di gobiernonan nobo den tur cuatro paisnan ta crea un periodo di reorientacion politico, caminda confianza y coordinacion mester wordo reconstrui. Pa Lindor, e siguiente paso decisivo ta converti dialogo strategico na plan concreto cu por wordo implementa den corto y mediano plazo.
Cu esaki, FUTURO ta manda un mensahe cla: cooperacion den Reino tin balor solamente si e ta traduci na resultado tangible pa bienestar di ciudadano den tur e paisnan envolvi.