Relashoná ku e preokupashonnan ku a surgi despues di sierto ekspreshonnan durante e reunion públiko di orashon di fielnan dia 11 di yanüari di e aña akí, gezaghèber di Boneiru tabatin un enkuentro ku organisadónan di e evento. E enkuentro tabatin komo meta pa promové komprendementu mutuo i pone énfasis riba balor di inklusividat.
Durante e kòmbersashon e organisadónan di e evento a kompartí nan perspektiva i nan a splika loke a pasa. Nan a aksentuá ku nan mensahe ta basá riba amor i rèspèt, i ku nan ke komprometé nan mes pa un aserkamentu kaminda tur grupo den nos komunidat ta sinti nan mes respetá.
Den e kòmbersashon gezaghèber a suprayá importansia di derechonan fundamental den nos komunidat, manera libertat di ekspreshon di opinion i di konvikshon di bida, i importansia di prevenshon di diskriminashon. E tabatin apresio pa e aktitut yen di komprenshon di e organisadónan i pa e echo ku nan ta konsiente ku tur hende mester ta liber pa profesá nan opinion i fe, pero ku hasiendo esei naturalmente nan tin ku tene kuenta ku tur grupo di poblashon na Boneiru. Aunke ku pa hopi aña kaba nan ta organisá e evento ku un impakto predominantemente positivo, e organisadónan a splika tambe kiko a bai ménos bon e aña akí i pa esei nan a tuma responsabilidat tambe.
Komo tata di pueblo, gustosamente gezaghèber ta bai den kòmbersashon ku tur grupo den nos komunidat pa buska konekshon, no opstante sierto diferensianan di opinion. Pa e motibu akí tambe e ta satisfecho ku a hiba e kòmbersashon konstruktivo akí. Solamente ku un diálogo habrí i rèspèt mutuo, nos por edifiká un komunidat harmonioso, kaminda kada individuo ta sinti su mes rekonosé i apresiá.
