Den un esfuerso pa mehora e calidad di bida y salud di nos poblacion, Departamento di Salud Publico (DVG) hunto cu Salud Hubenil (JZS) ta cla pa implementa planinan nobo enfoca riba prevencion primario y e lucha contra obesidad.
E maneho aki ta bin como respuesta na e preocupacion creciente over di e impacto di obesidad riba salud di e ciudadanonan na Aruba. Segun Minister di Salud Mervin Wyatt Ras a duna inicio na un serie di medidanan preventivo cu tin como obhetivo central educa y guia e comunidad den un direccion mas sano.
Moratorio riba Permiso pa Fast Food
Un di e decisionnan mas impactante den e plan aki ta e aprobacion di un moratorio riba permisonan nobo pa restaurantnan di cuminda lihe (fast food). Minister Mervin Wyatt Ras a duna luz berde pa para e dunamento di e permisonan aki pa un periodo di tempo, cu e meta pa frena e facilidad di acceso na cuminda cu no ta saludabel y asina manda un señal cla cu Aruba ta serio den su lucha contra e malesa aki.
Programanan di Guia y Prevencion
Fuera di e restriccionnan legal, e plan ta inclui tambe un parti educativo y di apoyo directo:
- Promocion di Estilo di Bida: Lo lansa programanan special pa educa comunidad riba con pa mantene un estilo di bida activo y balansa.
- Nutricion y Comemento Sano: Lo ofrece guia profesional riba nutricion pa yuda personanan baha peso den un forma safe y sostenibel.
- Preparacion pa Operacion: Pa personanan cu mester di operacion, lo tin dietnan special y programanan preventivo pa prepara nan curpa debidamente.
Pa e proyectonan aki sea exitoso, tin un colaboracion estrecho cu Algemene Ziektekosten Verzekering (AZV). Pa motibo cu AZV ta den un posicion financiero positivo cu un surplus, tin e espacio necesario pa inverti mas den e pakete di prevencion. Esaki ta crucial pa sigura cu tur ciudadano tin acceso na e cuido di calidad cu nan merece ora nan bira malo, pero specialmente pa evita cu nan ta bira malo den e prome luga.
Actualmente, expertonan ta evaluando e leynan actual pa mira ki otro consehonan legal y caminda legal por cana pa fortifica e maneho di salud publico aki. Cu e pasonan aki, Aruba ta cana den direccion di un futuro caminda salud y bienestar ta e prioridad principal.