Parlamentario Hendrik Tevreden ta duna di conoce cu den ningun momento parlamento a haya informacion y for di salida e proceso e la wordo kibra. Un gobierno cu sa cu e tin e mayoria di su banda pa sostene ta haci un acto asina aki di bay continua cu un palabracion cu tin y hiba esaki na Rijksministerraad RMR.
Parlamentario Hendrik Tevreden ta indica cu gobierno di AVP –FUTURO a kibra e proceso y a torno e democracia di Aruba na salida di tur e escenario aki cu Aruba ta bibando na e momentonan aki. Parlamentario Hendrik Tevreden ta kere cu ta hopi condenabel pa un gobierno riba un tema asina sensitivo y hopi hende ta hopi emocional ta tuma un decision asina drastico siendo cu Aruba no ta mal para.
Den pasado tin profesornan cu a duna nan pensamento riba un consensus Rijkswet y esaki a wordo mira como negativo den nan bista y den nan wowo como profesornan di ley. Segun parlamentario Hendrik Tevreden COHO cu tin mes un principionan den e mes un comparacion cu e Rijkswet aki y cu a wordo bari for di mesa pa e propio Hulandes nan mirando cu Tweedekamer a bisa cu nan no por contesta locual cu ta e pregunta cu Aruba a lansa pa Tweedekamer contesta.
Na varios ocasion a mustra Tweedekamer cu Hulanda ta tratando cu Aruba na un manera inconstitucional y loke cu a haya como resultado ta cu COHO a wordo bari for di mesa. Di e manera aki e la bira un onderlinge regeling unda cu e no tin e peso y e no tin tampoco e boeinan unda cu ta kita Aruba su libertad financiero como Pais Aruba.
Si mira e dos nan aki como ehempel e profesornan Hulandes mes a indica cu consensus Rijkswet no ta di un forma positivo y tambe si mester mira e mes un principio pa kico COHO a wordo bari for di mesa ya bay den onderlinge regeling mas ainda por bisa cu e gobierno a actua completamente robes.
Gobierno di AVP –FUTURO mester a duna parlamento di Aruba prome e consepto di ley pa debati riba esaki prome cu bay Rijksminister Raad RMR entrega e documento. Parlamento mester a debati riba esaki prome pa parlamento por papia, esaki no ta conta solamente pa Aruba pero esaki ta poni den e acuerdo di IPKO tambe.
E palabracion a wordo haci cu presidente di parlamento y fraccion di AVP cu lo ta bay tin un reunion habri riba e Rijkswet. Parlamentario Hendrik Tevreden ta duna di conoce cu Parlamento di Aruba a haya informacion di Rijkswet di ambtenaar nan y esey a tuma luga den un reunion cera , no for di e minister.
Loke cu ta un realidad ta tambe cu parlamento no ta deal cu Ambtenaar , ambtenaar ta cay bou di gobierno di Aruba y gobierno ta cay bou di parlamento y parlamento ta deal cu gobierno. Ta di lamenta cu minister Geoffrey Wever ta bisa cu e ta considera cu reunionnan cu ambtenaar nan ta e reunion, mas ainda por mira con gobierno di AVP –FUTURO mas ainda ta keda cu e pensamento di kibra ley, trapa riba ley, trapa riba democracia di Pais Aruba.
Parlamento di Aruba no ta deal cu ambtenaar, e ambtenaar ta somete na gobierno na minister nan y gobierno mester somete su mes na parlamento, asina ta e forma con nos constitucion ta hinca den otro. E reunion oficial ta na momento cu gobierno di Aruba ta bin oficial na parlamento y ta informa parlamento y ta keda na parlamento pa bisa gobierno e ora ey si ta diacuerdo of no ta diacuerdo cu loke ta poni y por pone un amienda y un mocion tambe pa loke ta e cambionan pa dirigi gobierno unda pa bay. Sinembargo ta mustra cu ta gobierno di AVP –FUTURO ta esun cu ta hefe riba parlamento , pero e realidad ta cu ta parlamento ta hefe di gobierno y ta gobierno mester bin duna parlamento cuenta di loke ta nan trabou ta y kico nan ta haci, esaki nunca no a pasa.
Na momento cu e Minister bin parlamento e ora e por sigui negosha cu Hulanda no visa versa manera ta pasando actualmente. E reunion di dia 29 di augustus 2025 pidi pa fraccion di PPA y MEP a habri y nan a bisa cu nan a entrega e ley na Rijksministerraad y e ora lider di fraccion di AVP a haci peticion pa cera e reunion pa por revisa e documentonan pa 2 siman y awe 2 siman a pasa caba y e reunion no a wordo yama ainda.