Resientemente a tuma lugá un evento históriko na Renaissance Wind Creek Curaçao Resort: e Asamblea General Statutario di e Asosashon Internashonal di Konseho Ekonómiko Sosial i Institushonnan Similar (AICESIS). E konferensia a trese huntu delegashonnan di mas ku sinkuenta pais, inkluyendo produktornan di maneho i representantenan di organisashonnan internashonal, i a marka un punto di altura pa Kòrsou riba plano internashonal den koperashon multilateral i diálogo di polítika. E reunion di un karakter híbrido a marka un konklushon sobresaliente di Kòrsou su presidensia di AICESIS, e organisashon global ku ta uni mas ku setenta konseho ekónomiko i sosial. Despues di dos aña di kolaborashon intensivo, diplomasia i interkambio di konosementu, Kòrsou a entregá ofisialmente e presidensia na Gresia, ku un promesa kaluroso pa sigui duna sosten kaminda ta nesesario.
Dia 30 di òktober a tuma lugá e promé reunion di e direktiva, siguí pa un tayer inspirativo tokante Inteligensia Artifisial (AI). Durante e seshon menshoná, dos oradó internashonal invitá, unu representando e Direktor General di Organisashon Internashonal di Trabou (ILO) i e otro for di e ofisina UNESCO pa Karibe, a pone e tono dor di relashoná e tema di e tayer ku akshon di polítika mundial. E tema sentral, “Uza AI pa bon, ta rekerí akshon alineá di parti di gobièrnu, partnernan sosial i institutonan internashonal,” a aksentuá e importansia di koperashon pa por realisá tur e potensial positivo di AI. Temanan ku a keda diskutí a inkluí formanan nobo di trabou, trahadó di data, e impakto riba kondishonnan di trabou, alfabetisashon den AI, i integridat di data.
E seremonia ofisial djabièrnè 31 di òktober a keda habrí pa Sekretario General di e Konseho Sosial i Ekonómiko (SER) di Kòrsou, señor Raul Henriquez, i a kontinuá ku diskursonan inspirativo di parti di e presidente saliente di AICESIS, señor John Jacobs, Minister di Enseñansa, Siensia, Kultura i Deporte señor Sithree van Heydoorn i Promé Minister di Kòrsou, señor Gilmar Pisas.
Gobernador Interino señora Michèle Russel-Capriles tambe a asistí na e seremonia di apertura. E ambiente tabata kaluroso, yen di sentido di orguyo i di nifikashon profundo ku un reflekshon riba kon leu Kòrsou a yega riba e plataforma global di diálogo sosio-ekonómiko.
Promé Minister señor Gilmar Pisas a enfatisá durante su diskurso e importansia di kolaborashon i inklushon den un temporada di tantu insiguridat den mundu:
“Presensia di AICESIS ta kòrda nos ku diálogo ta keda e instrumento mas poderoso di gobernashon i pas. Ora gobièrnu, empleadonan i trahadónan ta traha huntu riba un base igual, sosiedatnan ta bolbe deskubrí nan propósito kompartí den diversidat.”
Minister di Enseñansa, Siensia, Kultura i Deporte, señor Sithree van Heydoorn, a boga pa uzo responsabel i inklusivo di inteligensia artifisial den edukashon, bisando:
“Nos vishon ta kla: teknologia mester sirbi humanidat. AI mester fortalesé enseñansa, protehá privasidat i promové akseso igual. Dor di konektá inovashon ku inklushon, nos por kombiná demokrasia ku desaroyo.”
Presidente saliente di AICESIS, señor John Jacobs, a reflehá ku orguyo riba dos aña fruktífero di liderazgo di Kòrsou: “Desaroyo no ta un kareda pa ‘output’, sino un buskeda di balanse entre inovashon i koheshon, prosperidat i responsabilidat. Nos kolaborashon ku UN, ILO i EU ta mustra ku diálogo i konfiansa ta keda e fundeshi di kresementu inklusivo.”
Durante e Asamblea General, SER di Kòrsou a keda aseptá atrobe komo miembro den e direktiva pa e Region Latino Amérika i Karibe, pa e siguiente dos añanan, i señora Sboui- Racamy, asesor prinsipal na SER di Kòrsou, a keda nombrá atrobe komo vise sekretario general pa nos region. Den e kuadro aki e lo kordiná un proyekto ku e profesor húngaro Gustáv Báger, uzando nan koleganan ‘counterpart’ den Brasil komo ehèmpel.
E Asamblea General a konkluí ku un di dos reunion di direktiva (board), presidí pa e presidente nobo, e Konseho Ekonómiko i Sosial di Gresia (OKE), señor Ioannis Paidas. Loke a kuminsá manera un momento formal di transishon, a transformá den un selebrashon di koperashon, konfiansa mutuo i e kreensia kompartí ku un isla chikí por hasi un impakto grandi riba mundu. E delegashon internashonal tambe a gosa di un programa kultural i sosial ku a duna nan un eksperensia genuino di e kalor, hospitalidat i patrimonio kultural riku di Kòrsou.
