Featured Bonaire

Gobièrnu di Boneiru ta anunsiá ku preis di koriente ta baha


Gobièrnu di Boneiru i WEB den koperashon ku Gobièrnu di Hulanda a traha huntu riba un propuesta pa baha preis di koriente na Boneiru. Entrante 1 di yanüari 2023,  e subsidio pa redusí preis di koriente lo drenta na vigor.  E tarifa figo, ku aworaki ta un averahe di 390 dollar, lo keda eliminá entrante di 1 yanüari 2023. Banda di esaki lo subsidia mitar di e tarifa variabel di koriente ora esaki ta riba 0,38 dollar pa KWh. E areglo aki ta konta pa tur kliente di WEB i lo ta vigente pa minimo 1 aña. E subsidio aki ta forma parti di e plafòn pa preisnan di energia ku a introdusí na Hulanda.

Gobièrnu di Boneiru ta trahando proaktivo pa mehorá e forsa di kompra di komunidat, pero tambe duna e sosten nesesario na empresanan mediano i chikitu. Gobièrnu di Boneiru ta satisfecho ku despues di un trayekto intensivo huntu ku WEB i Gobièrnu di Hulanda a yega asina leu ku un resultado konkreto ku ta na benifisio di nos komunidat.

Manera ta konosí, e efektonan di e pandemia i tambe e situashon di guera na Ukraina a afektá mundu kompletu i sigur tambe Boneiru.

Den último aña nos a sinti e efektonan aki i esaki a keda reflehá den subidanan di preis, i esaki ta konta pa preis di koriente tambe. E areglo aki lo trese un alivio pa henter komunidat di Boneiru. E kas di famia mas chikí te na kompanianan mediano i chikí i tambe instansianan karitativo, deportivo i kultural, lo por benefisiá di e areglo aki. Koriente ta un gastu grandi den nos hogarnan i den komersio. E redukshon aki lo por duna espasio pa preisnan di komestibel por baha tambe, manera ya tabata e kaso den pasado.

Gobièrnu di Boneiru riba su mes tambe a hasi un proposishon  pa reservá fondonan pa e subsidio pa baha gastu di koriente drenta na vigor for di e aña aki mes. E proposishon aworaki ta na Konseho Insular pa tuma desishon riba dje den e próksimo simannan.

Gobièrnu di Boneiru ta masha agradesido ku Gobièrnu Hulandes pa e sosten aki. Nos ke yama un danki tambe na WEB ku a yuda ku e preparashon di e proposishon. Asina nos ta trahando huntu pa por yega na un subida di forsa di kompra pa komunidat kompletu.

Related posts

#MiMundoNobo den wowo di nos hobennan

EA News Author

DIMAS ta splica e meta y proceso di e vuelonan humanitario di Regreso Boluntario

EA News Author

Dutch Caribbean Nature Alliance ta organisa sesion specifico pa conservacion di naturalesa den Caribe Hulandes na Congreso Mundial di Conservacion

EA News Author

Leave a Comment