Raoul White di Groenlinks/Pvda tambe tabata presente na e debate di “ Politiek Cafe “ cu Arubahuis a organisa y ta indica cu tipo di debate nan asina, ta importante unda cu tanto e politico y e studiante ta haya informacion. Raoul White di Groenlinks/Pvda ta kere cu e hoben ta e futuro y ta importante pa scucha pensamento di e hobennan y duna nan atencion. “Si como partido nos por traha cu stem di hobennan, esey ta di gran balor, sr. White a expresa.”
Sr. White conta cu un reto grandi cu e hobennan cu ta bay studia na Hulanda tin, ta cu e fiansa di studiante ta hopi halto. Estudio ta caro y sigur si bo ta bin di e islanan bo tin mas gasto, manera costo di vivienda, bo mester cumpra paña y come etc. pues unabes cu bo scoge pa studia na Hulanda bo mester ta consciente cu esey ta un decision hopi caro. Ademas e ta importante tambe pa studiantenan di e islanan cu ta studiando na Hulanda y cu ta pensa di bay bek pa contribui na e islanan, pa ta consciente di e haltura di e prestamonan aki. Vooral ora cu mester paga esaki bek cu entrada cu ta mas abou na e islanan.
Sr. White ta propone pa bin cu fondonan pa studiantenan cu ta desea di bay bek pa contribui na economia di e islanan, cu un parti di e debenan aki ta wordo elimina. Esey ta un forma cu por yuda alivia e peso financiero for di studiantenan.
