KRALENDIJK, Bonaire
En total 423 shofùr na Boneiru a laga tèst nan glas di outo pa mira kuantu lus esakinan ta laga pasa. E tèstnan a tuma lugá durante e wikènt tras di lomba. Siman pasá Konseho Insular a disidí ku entrante 1 di mart glas di outo mester laga 35% di lus pasa. Riba djasabra 29 di febrüari 127 shofùr a laga tèst nan glas di outo na Rincon. Riba djadumingu 1 di mart 296 a hasi esaki na Playa. Na Rincon 116 di e 127 glasnan di outo ku nan a laga tèst no tabata kumpli ku e norma di laga 35% di lus pasa. Na Playa 261 di e 296 outonan ku a bai pasa tèst no tabata kumpli ku e norma. Kuerpo Polisial Hulanda Karibense a hasi e tèst i tabatin tambe empleadonan di Entidat Públiko Boneiru presente pa kontestá pregunta tokante e glasnan di outo. Huntu ku polis Entidat Públiko Boneiru ta bai wak si dentro di poko nos siudadanonan ta bolbe haña chèns pa laga tèst nan glas di outo. Riba e potrèt por haña un impreshon di e tèst FOTO: OLB
