KRALENDIJK, Bonaire
Komunidat Boneiru tin ku tene kuenta ku den oranan binidero lo tin hopi santu di e desierto Sahara den aire. Esaki por ta un molèster pa hopi hende. For di Salubridat Públiko ta konsehá espesial esnan ku ta sufri di asma òf otro kondishon médiko ku pulmon pa keda paden mas tantu posibel. Hasi esaki te ora ku e nubia di santu di e desierto Sahara pasa.
Riba imágennan di satélite por mira ku tin un kantidat grandi di e santu di e desierto Sahara den aire ku a drenta den e region di Karibe. Un di e konsekuensianan por ta ku na diferente kaminda no por mira leu manera normal. Outomobilistanan i tur otro ku ta kore riba kaminda tin ku tene kuenta ku nan bista por ta ménos.
Ta un kustumber ku bientu ta hisa un kantidat di e santu di e desierto di Sahara i mand’é den nos direkshon. Ta dependé di e kantidat di santu den aire i e direkshon di bientu ku e molèster ta dura algun ora òf algun dia. Pa esei Salubridat Públiko ta konsehá, sigur esnan ku tin problema ku hala rosa, asma òf un kondishon médiko na pulmon pa keda paden mientrastantu e santu di Sahara ta pasando riba nos isla.