Den menos cu 1 siman, riba diamars 30 di mei venidero di 2’or pa 6’or lo tuma lugar e cumbre virtual (virtual summit) ‘Ignite Your Feminine Power’. E evento aki ta disenja pa e hende muhe cu ta considera su mes un high-achiever y ta cla pa trece cambio den su bida personal y profesional pa asina experiencia bida na un forma mas trankil y placentero.
E idea pa e evento virtual aki a nace despues cu life coaches Kristel Browne y Ana Maria Tromp a reuni algun biaha pa un coffee date y a bin na e conclusion cu e manera con mayoria hende muhe ta bibando nan bida no ta uno cu ta sirbiendo nan.
Influencianan social, cultural y experiencia di bida ta hasi cu hende muhernan mayoria bez ta sinti preshon pa mester por hasi tur cos, ta tur cos, y pa profila nan mes na un cierto manera. Ta wordo sperá di e hende muher cu e ta exitoso den tur aspecto y cada area di su bida, esta den su carera, como mama, como pareha, amiga etcetera. Stress, ansiedad y burn-out ta algun di e sintomanan cu e hende muhe cu ta considera su mes un high-achiever y cu ta hasiendo su best pa balansa tur cos, lo por experienciá a consecuencia. Esaki por tin efectonan negativo ariba su salud y calidad di bida.
Durante e virtual summit ‘Ignite Your Feminine Power’, 5 orador di Aruba den persona di Kristel Browne, Ana Maria Tromp, Dina Alexander, Derin Kucuk y Carina Wever, lo splica con conectando cu e energia femenino interno por trece cambio positivo den e bida di e hende muhe. Cada orador lo papia desde nan area di experticio compartiendo nan conocimiento y experiencia personal riba temanan manera energia interno femenino y masculino, mindfulness, sexualidad, sensualidad, intimidad, body work y hopi mas.
Participantenan lo hanja tipsnan sumamente valioso y un plan practico cu ta sirbi como guia pa cuminsa cambia nan bida. E charlanan lo tuma lugar live di 2’or di merdia pa 6’or di atardi, pero pa esnan cu no logra sigui full e evento live virtualmente lo tin un ‘replay’ disponibel, pues por wak e grabashon bek na cualkier momento.
E meta di e virtual summit aki ta pa consientisa y educa, pa demonstra y comparti cu e hende muhe cu ta considera su mes un high-achiever cu ta posibel pa biba bida na un manera cu lo sirbie miho, door di scucha su curpa y conecta cu su fisiologia, su necesidadnan, deseonan, balornan y tur locual cu ta trece placer y paz mental na dje.
Pa mas informashon y/of registrashon por bishita e pagina di Facebook: Ignite Your Feminine Power.