E pasado di sklabitut kolonial di Hulanda i su impakto a forma diferente pais rònt
mundu profundamente. Tòg e konosementu ku ta disponibel tokante e pasado di
sklabitut kompartí akí ta skirbí partikularmente for di perspektiva kolonial. Pa enrikesé
nos perspektiva, minister Dijkgraaf (Enseñansa, Kultura i Siensia) ta inisiá un
koperashon global di sientífikonan riba e tópiko akí awe na Aruba. Esei el a anunsiá
awe durante un mishon di konosementu den Karibe.
Dijkgraaf: “Mas konosementu sientífiko di nos pasado kompartí ta di gran importansia. Den
esei ta esensial ku tin espasio pa hasi investigashon for di perspektivanan nobo, na e
lugánan kaminda sklabitut tabata eksistí. E konosementu ku esei produsí ta di gran balor pa
komprondé nos historia kompartí mas mihó. Mi ta konsider’é hopi balioso pa por inisiá e
programa di investigashon akí durante e Aña di Konmemorashon Pasado di Sklabitut.”
Inisio den e área karibense
Dijkgraaf kier promové e kolaborashon di konosementu riba pasado di sklabitut entre
universidatnan rònt mundu, kuminsando den nos propio Reino. Pa investigashon na Aruba,
Kòrsou i Sint Maarten e ta destiná 375.000 euro te ku 2027. Ku esei sientífikonan lokal por
hasi investigashon riba pasado di sklabitut den e paisnan akí.
Lo tin posibilidat tambe pa hasi investigashon riba e tópiko akí na Hulanda Karibense
(Boneiru, Saba i Sint Eustatius). Tin un presupuesto apart pa esaki.
Liña kòrá rònt mundu
Hulanda tin laso profundo ku Sürnam, Indonesia i Suráfrika tambe, debí na e pasado di
sklabitut kompartí. Hulandesnan a bende hopi persona sklabisá aya, òf a transportá nan via
e paisnan akí.
E konteksto históriko i kontemporáneo ta diferensiá di un pais pa otro. Trese e diferente
perspektivanan huntu ta di gran balor agregá pa mihó komprenshon di nos historia kompartí.
P’esei Dijkgraaf kier duna huntu ku Sürnam, Indonesia i Suráfrika, e investigashon sientífiko
riba pasado di sklabitut tambe un impulso den e paisnan ei. E idea pa esaki a surgi durante
mishonnan di konosementu pa e paisnan akí, na unda Dijkgraaf a papia ku diferente
sientífiko ku ta investigando e pasado di sklabitut. E plan ta pa duna e koperashon sientífiko
forma di mes manera ku den e parti karibense di nos Reino.
E promé kombersashonnan ku e paisnan akí ta positivo. Ta eksistí un gran sentimentu
kompartí riba importansia di kolaborashon sientífiko.
Kompartí konosementu
Kompartí konosementu ta un punto di salida importante di e programa di investigashon
global. Na e momentunan akí ta elaborando riba kon e lo bai ta. E promé ideanan ta pa krea
un ret di investigashon, eksposishonnan ambulante, un buki òf un konferensia di apertura i
klousura. Sientífikonan hulandes tambe lo haña un papel den esei. Mas lat e aña akí esaki
lo haña mas forma.
Mas espasio pa diferente perspektiva den enseñansa i investigashon
Sekretario di estado Van Huffelen a anunsiá aña pasá na e konmemorashon di Tula na
Kòrsou ku gabinete ta establesé un kátedra pasado di sklabitut pa Aruba, Kòrsou i Sint
Maarten. Awor Dijkgraaf ta duna kontenido na esei ku e koperashon sientífiko akí, den forma
di un kátedra internashonal impakto di e pasado di sklabitut. Tambe gabinete ya a anunsiá e
beka di Tula, ku ta karga nòmber di e lider di e rebelion grandi di esnan sklabisá na 1995 na
Kòrsou. Pa medio di e beka akí, pa aña un studiante di Kòrsou ta haña oportunidat pa sigui
un estudio bachelor di dosente di historia na Hulanda na un akademia di su eskoho. Di
manera ku tin mas espasio pa diferente perspektiva den enseñansa i investigashon.