Ku orguyo Tourism Corporation Bonaire (TCB) ta presentá un Mapa di Rincon nobo nobo, nèt na tempu pa e festividatnan kultural den e bario mas bieu di Boneiru. TCB su propio Virgy Balentin, un miembro dediká di nos tim di merkadeo, a desaroyá e inisiativa akí.
Virgy, ku tin un laso fuerte ku Rincon, a krea e mapa akí pa fiha atenshon riba un parti di Boneiru, ku hopi biaha nos bishitantenan ta keda sin mira. Inspirá pa su desendensia i e informashonnan ku el a haña serka empresanan lokal, e kier a duna nos bishitantenan un mihó imágen di e bario. Hopi bishitante ku ta bayendo den direkshon di nos Parke Nashonal Washington Slagbaai, a indiká tambe ku nan ke sa mas tokante historia i kultura di Rincon, i su atrakshonnan.
E mapa ta un guia práktiko i atraktivo ku e sitionan di mas importante i mas bunita na Rincon, ku bo no por keda sin bishitá. For di 1 di aprel 2025 e mapa ta optenibel na TCB i den kurso di luna di aprel ta hiba nan pa vários empresa na Rincon.
“Mi ta inkreibelmente orguyoso di nos kolega Virgy pa e dedikashon i e trabou duru ku el a hinka den e proyekto akí. E mapa akí no ta mustra solamente Rincon, nos bario di mas bieu, pero e ta mehorá tambe nos oferta di produkto i e ta enrikesé e eksperensia Boneiru. Mi ta sigur ku tantu nos poblashon lokal komo nos bishitantenan lo hañ’é balioso, prinsipalmente awor ku selebrashon di Dia di Rincon ta aserkando,” segun Elesiër Angel, direktor statutario interino di TCB.
Un danki ta bai na Departamento di Realisashon di Direktorado di Planifikashon i Desaroyo (R&O) ku a sòru pa TCB haña un mapa detayá di Rincon. Esaki a resultá sumamente útil na momentu di krea e mapa nobo akí.
Pa mas informashon, tuma kontakto ku Virgy Balentin via virgy.balentin@bonaireisland.com.