Marcanan di dos aña como representante di pueblo, Parlamentario John Hart (AVP) a reflexiona riba e inicio di e aña parlamentario nobo, resaltando cu e responsabilidad di e trabou aki ta un gran honor, pero tambe un compromiso firme di control y debate critico pa e futuro di Aruba.
Durante su intervencion, Hart a enfatisa cu mas aya di e ceremonial di apertura, e tarea fundamental di un parlamentario ta pa controla gobierno. Como presidente di e Comision di Husticia, e parlamentario a duna siguimento na temanan crucial manera e capacidad di e cuerpo policial, e reto di vivienda y e maneho di delincuencia hubenil.
Dos ley clave den agenda: Investeringsfonds y LAP
Hart a señala dos iniciativa legislativo di sumo importancia cu mester wordo debati mas pronto posibel den Parlamento:
1. E Ley di Inversion (Investeringsfonds): Un ley cu Hart a cualifica como historico, ya cu lo determina unda y con ta bay aloca recursonan pa inverti den e desaroyo di e pais.
2. E Ley di Algemeen Pensioen Aruba (LAP): Introduci pa AVP na 2011, e ley aki tin como meta duna e trahadonan di sector priva e siguridad di un penshon digno. Hart a expresa su preocupacion pa e casonan unda empleadonan ta yega edad di pension y ta descubri cu doñonan di trabou no a duna over e premie nan retene, El a recorda cu for di 2017 e Conseho Economico Social (SER) a conseha pa nombra un supervisor (toezichthouder) pa e ley aki.
Retonan holistico: Vergrijzing y un ‘Manpower Planning’ Nacional
Un di e puntonan mas critico cu e parlamentario a trece dilanti ta e situacion di e envejecimiento di e poblacion (vergrijzing) na Aruba y e falta di un vision cla pa futuro:
“Nos tin un situacion grandi di vergrijzing na Aruba y ta bay yega un momento cu nos tin cu hiba un debate den sala di Parlamento riba ki tipo di manpower planning nos tin. Ki tipo di personanan nos ta importando pa contribui den e economia aki y den ki direccion nos ta bay cu Aruba den aña 2040?”
Tambe Hart a cuestiona, urgiendo pa analisa si e actual Ley di Admision y Expulsion (LTU) ta adapta na e modelo economico y e mercado laboral di awe.
Hart a reitera cu e problematica nan di e pais mester wordo trata di un forma integral y holistico, mirando cu asuntonan di husticia y delincuencia hubenil hopi biaha ta inicia den e ambito social, e altisimo indice di divorcio y e falta di acceso na ‘naschoolse opvang’.
Exigencia di rendicion di cuenta y e reunion di RAFT
Haciendo un apelacion pa autocritica, Hart a declara cu e ministernan mester drenta mas frecuentemente den sala di Parlamento pa duna y rindi cuenta riba temanan dificil.
Finalmente, tocante e reunion di e Ley di Reino pa Control Financiero (RAFT), Hart a urgi pa e tuma luga lo mas pronto posibel pa debati riba e finanzas publico y e autonomia di e pais. El a pidi pa mantene e respet den e debate politico y evita retorica cu ta perhudica e avance di e pais.
“E Gobernador a bis’e tambe: nos mester prepara nos mes pa nos por laga e pais aki miho pa e generacion cu ta bin,” Hart a conclui.