Den cuadro di e siman di Justitieel Vierlanden Overleg cu ta tuma luga e siman aki na Aruba, Minister di Husticia di Aruba, mr. drs. Arthur Dowers, a ricibi Minister di Husticia di Corsou, mr. Shalten Hato, pa un bishita di trabao oficial. E reunionnan ta parti di e esfuerso continuo pa fortalece cooperacion regional den area di husticia y siguridad den Reino Hulandes.
Durante e reunion, a trata varios tema importante incluyendo criminalidad bao di hobennan y e uzo di carchi di cedula como documento pa biaha entre e islanan. Habitantenan di e diferente islanan di Caribe Hulandes ya ta uzando nan cedula pa por biaha entre e islanan ruman, mientras Aruba ta evaluando e paso aki, cu na final di dia ta beneficia e ciudadanonan den Reino Hulandes.
A pesar di e situacion actual na Hulanda cu a resulta den e caida di gobierno y e ausencia di su Minister di Husticia, Aruba ta sigui cu e proceso di colaboracion multilateral. Tur preparacion pa e Justitieel Overleg a sigui y lo culmina den un encuentro formal entre e tres Minister di Husticia presente, cu e proposito pa evalua puntonan pendiente y traha riba acuerdo di cooperacion structural. Tin un lista largo di cosnan cu tin colaboracion riba dje, pero mester wak e efectividad di esakinan y si ta logra e metanan desea.
Gobierno di Aruba ta duna balor na e tipo di dialogonan regional, cu ta contribui na desaroyo di un sistema di husticia mas fuerte, resiliente y efectivo pa tur ciudadano den Reino.