Djadumingu 6 di yüli, alrededor di 10.20 or di mainta ‘meldkamer’ sentral a risibí notifikashon tokante un kaso di tiroteo ku a tuma lugá na kas situá na Kaya Kuarta. Na yegada di polis na e sitio a tuma nota di probablemente perforashon di bala na e kas i tambe outo stashoná den kura.
Miéntras Kuerpo Polisial tabata na e adrès ariba menshoná, a risibí notifikashon di un di dos kaso di tiroteo ku a tuma lugá na Kaya Baracoa. Na yegada di polis na e sitio a tuma nota di probablemente perforashon di bala na un outo stashoná den besindario. Investigashon den ámbos kaso ta andando.
KPCN ta pidi kualke persona ku por a mira òf sa algu di e suseso aki, pa tuma kontakto ku polis via 715 8000 òf via di e liña di tep anónimo 9310.