Den un atardi bunita na Biblioteca Nacional a tuma luga un charla di lenga indigena tradicion y superviviencia. E anochi aki e orador principal ta Todd Dondandare Mag.Ling. cu a presenta un bunita charla riba e lenganan indigena tradicion y su supervivencia. Lamentabel ta cu te ainda den nos enseñansa na Aruba nunca no a percura pa conta nos propio historia. Na momento cu tin les di geschiedenis no a trece e historia di unda nos ta bin y kico ta nos raisnan. Awe e efecto nos como Aruba ta biba esaki unda cu e generacionnan ta lanta sin sa kende nan ta y di unda nan ta bin. No tabatin historia di un grupo cu yama Caquetio cu ta un grupo di indigena cu ta e historia di Aruba real.
Den e anochi por a tuma nota cu na Aruba tin hopi famia grandi cu ta indigena cu ta papia y compronde e lenga di arawa cual cu Caquetio ta forma parti , esaki ta partinan di Aruba cu ta importante pa e pueblo di Aruba sa di nan.
Lamentablemente scol no a siña nos nada di nos mes y ni nos propio lenga cu ta papiamento pa e ta bon hinca den e scolnan. Nos historia di sclavitud tampoco no a keda poni na scolnan ainda, lamentablemente nada di e historia nan valioso aki cu ta di nos mes no a keda poni den curriculum di scolnan.
Dicon esaki no ta wordo inculca den nos scolnan ? kico ta e problema tras di esaki realmente? Segun Todd Dondandare nos ta un pais colonisa for di 1636 bou di e Hulandesnan y awe ketobay Aruba ta forma parti di e colonia Hulandes y door di e colonisacion a haya hopi influencia cu ta kita nos for di loke nos mes ta, pa ta exacto ta kita nos identidad y esey ta haci cu nos mes ta nenga nos mes, nos ta nenga nos idioma.
Sinembargo esaki ta inaceptabel debi cu bo idioma ta bo identidad y ta bo bida, ta bo mes. Segun Todd Dondandare con por ta posibel ora cu bisa ta bay introduci papiamento na tur scol na Aruba y mayornan ta bay contra di esaki , esey kiermen bo ta bay contra di bo mes. Mirando e posicion di mayornan tampoco no tin un gobierno cu ta para firme y ta tuma un decision cu papiamento ta keda introduci na tur scol y nos historia tambe na bienestar di enseñansa y futuro generacionnan. E realidad ta cu enseñansa di Aruba mester por siña loke ta di nos tambe y esaki te dia di awe no tin den nos scolnan.
Sinembargo aña pasa a cuminsa cu un sistema nobo pa introduci papiamento na scolnan pero e ta solamente pa prome , di dos y di tres aña y despues di esey mester pasa over pa Hulandes, cu e decision aki no ta yega leu pa duna papiamento su luga manera e mester haya den nos enseñansa na Aruba. Mirando tur e desaroyonan aki Todd Dondandare ta kere firmemente cu Aruba ta colonisa mentalmente ainda. Lamentablemente ta biba e pensamento ainda cu loke ta di nos mes ta inferior na loke ta di afo, esaki ta biba den diferente parti y area, porehempel tur cos cu ta haya un nominacion ta haya esaki na Ingles y dicon no ta uza e papiamento? Tur e echonan aki ta muestra cu Aruba falta di identidad.
