Minister Maduro ta reuni tur siman cu persona y instancia cu ta activo riba e tereno di Arte y Cultura. Diahuebs ultimo e mandatario a reuni cu e directora y miembro di directiva di Cas di Cultura pa asina wordo informa di e actividadnan di e tarima importante aki pa nos Pais.
Cas di Cultura a haci un esfuerso pa asina e tarima por a keda activo durante e periodo di pandemia. Poco poco ta bay na normalidad y e sala grandi cada biaha ta mas yen pa presencia e variedad di presentacion. Cas di Cultura ta keda e tarima preferi pa diferente presentacion y e directiva kier dedica mas esfuerso pa e arte di teatro keda haya su lugar special riba e tarima principal aki.
Un tema importante tambe ta e renobacion y ampliacion cu mester tuma lugar na Cas di Cultura. Promer cu e pandemia e directiva di Cas di Cultura a traha riba un plan ambicioso, pero awor a dicidi di adapta e plan pa un ampliacion mas modera. Dentro di poco lo por tin un calculo di e inversion cu lo ta necesario pa haci e renobacion posibel.
Minister Maduro ta haci un apelacion pa e publico keda bishita Cas di Cultura y brinda nan sosten na e artistanan cu ta haci nan presentacion. E sosten di e publico ta keda importante y un Cas di Cultura yen ta keda brinda animo na tur artista cu ta deleita cu nan talento riba e tarima principal di nos Pais